Ministeriu Solidariedade Sosial iha tinan 2013 ne’e sei atende deit 2.500 vitima ba dezastre naturais iha teritoriu tomak tanba orsamentu limitadu tebes.
Vise Ministru Solidaridade Sosial (MSS), Jacinto Rigoberto dehan hare ba realidade ne’ebe akontese numeru vitima dezastre naturais aumenta maka’as, iha familias 3.000 mak identifika sira nia uma estragus hotu enkuantu osan iha deit $3,000,000.
”Ne’e sei la sufsiente atu responde ba vitima sira nia ezijensia,” hateten Vise Ministru Solidaridade Sosial, Jacinto Rigoberto, (18/02), iha Parlamentu Nasional.
Nia dehan, lolos MSS responde ho lalais kona ba vitima sira ne’e.
“Maibe dalaruma meus, rekursus umanu no rekurusu finanseirus ami limitadu pior liu dadus ne’ebe ami simu la justu entaun impede atu halo resposta imediatu,” dehan Vise Ministru MSS ne’e.
Nia dehan, dadus ne’e MSS halo verifikasaun iha tinan 2012, no husi numeru ne’e ema nain 1,000 resin konsege ona atende iha Dezembru tinan kotuk no agora kontinuasaun ho restu ne’ebe seidauk simu asistensia.
Enkuantu ba sira ne’ebe dadus tama ona iha Ministeriu maibe seidauk halo verifikasaun hamutuk 1.400 tanba rekursu humanu no rekurusu finanseiru ne’ebe aloka iha tinan kotuk la sufsiente.
“Ami sei hadia ami nia sistema atu iha futuru bele iha responde ne’ebe lalais,” promete Vise Ministru Rigoberto.
Iha parte seluk, membru Parlamentu Nasional, Deputadu Virgilio da Costa Hornai husu Ministerio Solidaridade Sosial atu ezekuta orsamentu liu-liu ba asistensia vitima dezastre nian tanba dezastre ema hotu laespera hira mak sei sai vitima pior liu vitima tinan kotuk mos seidauk rezolve hotu.
“Sira tenke ser maneja orsamentu ne’e iha ona atu responde ba vitima dezastre iha pasadu nian (2012) tanba dezastre naturais ita hotu la espera entau intervensaun governu nian nafatin atu fo asistensia nafatin ba vitima sira,” sujere Deputadu Hornai.
