Kenichi Sasaki, Resident Engeneering Japan International Cooperation Agency (JICA), dehan tuir planu obra ne’e sei remata no entrega ba governu iha dia 06 Agustu iha tinan 2013 ne’e.
Nia dehan, projeitu ne’e kaer husi kontraktor Tobishima Corporation, enkuantu material ne’ebe maka uza hodi halo rehabilitasaun portu ne’e mai husi nasaun rua.
“Material balun mai husi Surabaya, Indonesia no balun husi Japaun, iha materil balun hanesan raihenek agregat ne’e husi rai laran, husi Oe-Cusse mota Tono,” informa Resident Engeneering JICA, Kenichi Sasaki, (28/02), iha Mahata,Oe-Cusse.
Nia hatutan, maske portu ne’e nia dezain espesifiku ba deit Roo Nakroma, maibe roo bo’ot sira hanesan kargo bele mos atraka iha portu ne’e.
“Portu ne’e nia kapasitas ne’e 2000DWT, no roo ne’ebe ho naruk 80 meter mos bele atraka iha ne’e,” tenik Resident Engeneering Sasaki.
Engeneering Sasaki kalkula katak, portu ne’e sei uza ba durasaun tinan 50 nia laran tanba obra ne’e iha kualidade diak.
Rehabiliatasaun portu ne’e ho total orsamentu hamutuk $8.800.000, e projeitu ne’e rasik hanaran Projeitu Rehabilitasaun Urjenti ba Portu Oe-Cusse ne’ebe kompleta kedas ho terminal inklui armajen atu tau sasan hanesan fos no seluk-seluk tan.
Entretantu Deputadu Inacio Moreira, rekonese katak durante ne’e projeitu ne’ebe JICA kaer durante ne’e iha duni kualidade diak.
“Ezemplu konkreta maka rehabilitasaun ba fakuldade engeneeria iha kedas 2004 to’o ohin loron sei diak nafatin,” gava Deputadu Moreira.
Nia dehan, iha tempu badak, komisaun E (infra-estrutura, transporte, komunikasaun) sei ba halo fiskalizasaun ba obra hotu-hotu inklui portu Mahata ne’e.
“Ba projeitu fisiku hotu-hotu, ne’e tuir komitmentu no aroriu ne’ebe maka komisaun aprova,” dehan Deputadu ne’e.
