Iha ne’e Tribunal Distrital Dili (TDD) fo arguidu sira selu indeminizasaun hamutuk $450,00 e arguidu nain rua inklui fontes ne’ebe fo informasaun ba Jornalista nain rua ne’e (Mateus Sufa), sira sei selu kada ema ida $150,00.
Tuir Advogadu Cancio Ximenes katak, jornalista nain rua selu indeminizasaun tanba prokurador ne’ebe sira halo defamasaun ba nia, hafoin mosu ho kazu ne’e nia (prokurador) toba la dukur no kazu ne’e pertuba nia pessoal no familia nia sentimentu.
“Tuir hau nia interpertasaun, sira la apura katak komete krimi,katak sivil mos sira tenke libre husi responsabilidade sivil,” esplika Advogadu Cancio Ximenes, hafoin rona desizaun final husi TDD, (14/03), iha Mandarin, Dili.
Kona ba karik iha posibilidade atu halo rekursu, nia dehan sei halo konsultasaun ho nia kliente sira.
“Sira nain rua simu indeminizasaun sivil ne’e ga lae, sei kuandu sira nain rua la simu iha dalan seluk atu ita foti,” dehan Advogadu Ximenes.
Jornalista nain rua (Oscar Salsinha husi Suara Timor Lorosae (STL) no Raimundo Oki husi Independente) Ministeriu Publiku akuza sira ho kazu defamasaun liu husi istoria ne’ebe fo sai husi jornal STL edisaun 30 Janeiru 2012, ho titlu “Kazu Asidente, Diskunfia Prokurador Oe-Cusse Simu Subornu” enkuantu iha jornal Independente edisaun 02 Fevereiru 2012, ho titlu “Ema Nain 3 Mate Iha Insidente Tranzitu Iha Oe-cusse, Kondutor Halai Ba Indonezia, Patraun Sai Tarjetu Protesta Husi Familia Vitima”.
Tuir artigu 285 Kodigu Penal, alina 1; hateten ema ne’ebe ho meiu ida, iha autoridade nia oin ka publikamente ho konsiensia katak imputasaun ne’e falsu, denunsia ka soe suspeitu katak ema ida halo krime ida ho intensaun atu halo ema ne’e hasoru prosedimentu kriminal sei hetan pena prizaun tinan tolu ka multa.
Tanba ne’e Ministeriu Publiku akuza sira nain rua ho artigu ne’e tanba notisia ne’ebe fo sai husi jornal STL ho nia titlu “kazu asidente, diskunfia Prokurador Oecusse Simu Subornu” no husi Independente ho liafuan “ buat balun la’o la los”.
Kazu asidente trafiku kareta Angguna ne’e akontense iha Aldeia Nonan, Suku Bobometo, Sub-distritu Oe-Silo, Distritu Oe-Cusse iha data 18 Setembru 2011 ne’ebe maka rezulta Balbina Afiat (56), no labarik ida ho idade fulan sia (9), no Marcelina Kusi 64 mate. Hafoin akontesementu ne’e kondutor halai kedas ba iha Indonezia.
Primeiru julgamentu hala’o iha 28 Fevereiru iha Tribunal Distrital Dili no hamosu lamentasoens husi Asosiasaun Jornalista Timor-Leste Press Club no konsidera ida ne’e ameasas bo’ot ba instituisaun media hotu iha futuru.
Prezidente Timor-Leste Press Club (TLPC), Jose Belo via telephone hateten lolos Ministeriu Publiku la akuza no la halo julgamentu ba Jornalista direitamente maibe indika ba instituisaun media ne’ebe jornalista sira ne’e servisu ba.
“Se akuzasaun ba iha jornalista, ita kria prezedente ida katak iha futuru jornalista sei halai hotu, husik media mamuk no liberdade imprensa ne’ebe maka estadu konsagra iha konstituisaun sai mamuk,” preokupa Prezidente TLPC, Jose Belo, via telephone.
Entretantu Advogadu Cancio Ximenes antes ne’e husu ona ba TDD atu absolve tiha kazu ne’e tanba jornalista hakerek tuir duni akontesementu iha baze depois de asidente trafiku ne’ebe rezulta ema nain tolu mate.
