Deputada Josefa Alvares Soares, Prezidente Grupu Feto Parlamentar (GMPTL) hateten iha artigu 141 alina tolu; koalia kona ba feto isin rua ne’ebe fo konesementu ba ema seluk atu pratika abortu ka nia rasik mak provoka ho meus oi-oin halo abortu, sei hetan pena prizaun tinan tolu tanba ne’e krime halo violasaun hasoru direitu labarik.
Tanba ne’e nia preokupa bainhira pesoal saude sira maske identifika maibe la foti prosesu hasouru inan sira ne’e tanba iha artigu 141 Kodigu Penal koalia kona ba interrupsaun ba gravidas ka isin rua ne’ebe fo konesementu ba ema seluk atu halo aborsi ka nia rasik buka meius oi-oin atu estraga, ne’e krimi.
“Implementasaun mak seidauk diak, se servisu de saúde ne’ebe detekta ema ne’e halo abortu ho hakarak rasik sira la foti prosesu hodi hasoru inan sira ne’e, hatudu katak ita la tau seriadade ba implemetasaun lei ne’ebe iha entaun ema hotu estraga labarik,” preokupa Prezidente GMPTL, Deputada Soraes, (26/02), iha Parlamentu Nasional.
Nia esplika, aborsi iha oin rua ; ida aborsi spontan ka akontese derepente deit tanba impaktu husi moras malaria, monu, stress, ne’e oinseluk maibe abortu ne’ebe provoka rasik husi inan sira depois fo ona impaktu ba sira nia saude mak halai ba ospital, entaun parte ospital tenke foti prosesu hasoru inan ne’ebe estraga labarik nia vida ho hakarak bainhira hatene kauza husi aborsi, ne’e labele nonok deit.
Deputada ne’e afirma, artigu 141 ne’e iha parte balun mak presiza atu hadia, tanba momentu aprovasaun iha rekomendasaun lubuk ida husi parte Igreja nian.
Iha parte seluk, Koordenadora Klinika Marie Stopes Internasional Timor –Leste (MSITL), Fernanda Maria Serra katak, sira nia klinika sei la atende inan sira ne’ebe hakarak halo aborsi maske sira rasik mak husu.
Tanba tuir nia, Marie Stopes mosu iha Timor –Leste atu servisu hamutuk ho Ministeriu Saúde hodi redus taxa mortalidade inan ho oan iha rai laran laos atu halo pratika aborsi.
“Dala ruma inan barak mak mai husu atu halo abortus iha ami nia klinika maibe iha ne’e ami la halo, ami so fo konseling no korajen ba inan sira atu kuidadu sira nia bebe tanba ita hotu hatene ita ema moris ita labele halo ema ida moris no mate, so Maromak deit mak bele,” dehan Koodenadora Serra.
Alende ne’e Deputadu Estanislao da Silva mos konkorda katak, aborsi la’os dalan ne’ebe diak ba inan feto sira atu halo arbiru.
“Lei ne’e forte demais hau la konkorda ho abortus hanesan metodu planeamentu familiar maibe ita tenke kria kondisaun situasaun espesifika feto mos iha direitu foti desizaun ba nia vida,” dehan Deputadu da Silva.
