“Depois de aprovasaun orsamentu ne’e ministeriu sei hala’o levantamentu de dadus ida, mapamentu de dadus kompletu kona ba eskola hotu-hotu iha Timor-Leste laran tomak,”hateten Ministru Edukasaun (ME), Bendito Freitas, (18/02), iha Parlamentu Nasional.
Ministru hatutan, kona ba profesor voluntariu sira ministeriu sei halo estudus klaru ida atu bele hare kona ba total profesor nian inklui fatin hanorin iha ne’ebe, komesa iha sa tinan, hanorin materia saida, nune’e tinan ne’e bele fo rekonesementu ba sira.
“Total Profesor Voluntariu ne’ebe mak ami iha, hamutuk 3.962, presiza hatene lolos se mak profesor sira ne’e,” tenik Ministru Freitas.
Iha fatin hanesan Deputadu Agostinho Lay husu ba ministeriu edukasaun atu resolve lalais problema ba professor voluntariu sira ne’ebe durante tinan barak nia laran hanorin ona maibe la hetan salariu.
“Hau nia preokupasoens simplis deit, tinan ida ne’e ita bele rezolve ona ita nia profesor voluntariu sira ga la’e,” preokupa Deputadu Lay.
Alende ne’e Vise Ministra Ensino Baziku,Dulce de Jesus Soares sublina katak,tinan ne’e sei halo verifikasaun ba profesor voluntariu sira.
“Espera katak,iha 2013 ministeriu da edukasaun sei responde kondisaun profesor voluntariu sira,” Vise Ministra esperansa.
