Vise Ministra Edukasaun Ensino Baziku, Dulce de Jesus Soares hateten, livrus 185,702 mak bele ona halo distribuisaun ba iha eskolas sira iha rai laran.
“Balun seidauk tanba sei iha prosesu imprimi nia laran,” informa Vise Ministra,Dulce de Jesus Soares, (21/02), iha Comoro, Kampung Merdeka, Dili.
Nia esplika, livrus hirak ne’e iha material 13, mak hanesan Ekonomia (metodus kuantitativus),
Historia, Quimika, Geografia, Sosiologia, Geologia, Biologia , Matematika, Portugues, Inglesh, Fisika,Temas de Literature e Kultura inklui material Sidadania no Dezenvolvimentu. Kada livru (material) ida produs hamutuk 15.000.
Ministru realsa, livrus hirak ne’e sei distribui ba 75 Eskolas Ensino Sekundariu iha Timor laran tomak.
Tuir Vise Ministra ne’e katak, sentru imprime ne’e apoia husi Governu Korea liu husi sira nia ajensia Korean International Cooperation Agency (KOICA) ajuda hodi imprimi livrus ba eskolas hotu iha rai laran.
Nia dehan, koperasaun ida ne’e importante tebes tanba bele ajuda hodi produs livrus hodi responde preokupasaun kona ba falta livrus iha eskola sira hotu.
“Durante ne’e ita dehan livru laiha maibe agora ita konsege duni imprimi ita nia livru rasik,” tenik Vise Ministra Soares.
Enkuantu total staf (tekniku) Timor oan ne’ebe servisu iha sentru imprimi ne’e hamutuk ema nain 21, e sira hirak ne’e liu prosesu rekrutamentu.
Alende ne’e Reprezentante KOICA iha Timor-Leste, Jinjoo Hjun hateten, maske durante ne’e sira hasouru problema oi-oin kona ba produsaun livrus hirak ne’e maibe servisu hamutuk ho Ministeriu Edukasaun konsege finaliza produsaun.
“Ami espera katak iha aldeia hotu-hotu husi Oe-Cusse to’o Lospalos bele hetan hotu livru sira ne’e,no ami husu suporta nafatin ami hala’o servisu ida ne’e,” Reprezentante KOICA ne’e sujere.
Iha fatin hanesan Diretor da Eskola Sekundaria 04 de Setembru, Alberto da Costa Braz sente kontente tanba programa Governu nian atravesa husi Ministeriu da edukasaun fahe livru ne’e ba iha eskola sira bele fasilita profesor sira hodi hanorin materia sira ne’e ba estudantes sira.
“Livru ne’e sufisiente ba estudante no profesor sira hodi hanoin iha eskola,” tenik Diretor Braz.
