Diretór Nasional Kurikulum e Avaliasaun Eskolar, Raimundo José Neto dehan, durante ne’e estudante finalist sira halimar kleur fulan neen ka walu mak foin bele kontinua fali sira nia estudu iha rai liur, liu-liuiha nasaun rua ne’e.
“Tan ne’e mak ami hato’o ba iha señor ministru konkorda fila fali ba kaléndáriu nian hanesan uluk, agora ezame nasional dala ida hotu tantu eskola sekundaria ou pre-sekundaria tanbá kuríkulum ne’e implementa tiha ona iha tinan 2012 nune’e mos eskola primariu implementa iha 2006,” dehan Diretor Nasional Kurikulum e Avaliasaun Eskolar, Raimundo José Neto, (25/02), iha Vilaverde, Dili.
Nia dehan, Ministeriu Agrikultura ne’ebe iha eskola agrikula, sira propoin ho sira nia preokupasoens, hakarak kalendariu edukasaun hanesan fali uluk, nune’e estudante agrikula (Natarbora) sira ne’e bele halo estajiu kuda batar no aihoris sira seluk iha tempu udan.
“Parte tasi mane no rai klaran ne’e fulan Outubru no Novembru ne’e udan, sira hakarak atu alunus agrikula, atu halo estajiu iha terenu aprende oinsa atu kuda batar, modo no aihoris sira seluk,” dehan Diretor Neto.
Tuir nia, se karik tuir kalendáriu agora ne’e (Janeiru to’o fali Dezembru) entaun iha fulan Outubru no Novembru ne’e ezame no eskola agrikultura sira ne’e labele halo buat ida, tanbá ne’e mak tama iha prinsipius de Agusto no remata iha fin de Juñu no intervalu (feriadu) semana tolu.
Entretantu Profesora Eskola Sekundária 04 de Setembru, Augusta Cardoso hateten kurikulum foun liu-liu ba iha ensino sekundáriu buat di’ak tanbá haree ba teknolojia modernu no eskola tenke la’o ba oin.
“Maibe iha faillansu oituan mak sira halo kurikulu maibe sira lakonsulta ou sira la preparadu ezemplu kona-ba disiplina multimedia, goelogia, ho tan materia ne’ebé sira mak aumenta iha kurikulu ba ensino sekundáriu tanbá menus profesores no haruka profesores sira ne’ebé mak tuir nia area kedas pelu menus iha konesementu,” dehan Profesora Augusta.
Tanba ne’e nia husu ba Ministériu Edukasaun prepara kurikulu ne’ebé kapaas maybe tenke prepara mos profesores ne’ebé iha kualiadade no ekona-ba area ida-idak nian.
