Objetivu husi sukat tasi Timor ne’e, tuir Vise Ministru Negosiu Estranjeiru , Constancio da Conceicao Pinto katak atu hatene rai iha tasi laran to’o iha ne’ebe.
“Tasi ne’ebe haleu ita ,ita tenki ser sukat tuir direitu internasional,” hateten Vise Ministru Negosiu Estranjeiru,Constancio da Conceicao Pinto, iha Parlamentu Nasional, (15/02).
Kona ba tasi Timor nia luan hira, nia dehan “hau labele fo respostas, so ita nia tekniku sira mak bele fo,” dehan Vise Ministru Negosiu Estranjeiru ne’e.
Entretantu Deputadu Cesar Valente de Jesus katak, asuntu ne’e presiza duni atu toma atensaun, tanba tasi Timor parte ida ba soberania Timor-Leste.
“Presiza duni sukat tasi Timor nian tanba ita nia rekursus minerais barak mak iha tasi laran,” dehan Deputadu ne’e.
Iha fatin hanesan Deputadu Estanislao da Silva hateten, iha asina akordu entre governu Timor-Leste ho Australia ne’ebe halo iha tinan hirak liu ba katak bainhira dada kadoras mai Timor, mak sei la koalia tan kona ba fronteira maritime.
“Ita akordu ona ho Australia katak tinan 50 nia laran ita sei la diskuti kona ba fronteira maritima,” Deputadu ne’e teniki.
Nia sublina katak, tuir lei internasional nian fronteira maritima entre Timor ho Australia iha linha media.
