Tuir Prezidente Komisaun Anti Korupsaun (KAK), Komisariu Aderito de Jesus Suares katak, iha kazu balun maka sei prosesu hela iha Tribunal Rekursu.
“Iha lima ka neen hanesan ne’e hetan ona desizaun final iha tribunal, hau la lembra kazu saida deit, maibe iha kazu balun mos iha hela Tribunal Rekursu,” dehan Prezidente KAK, Komisariu Aderito de Jesus Suares, (19/02), iha Farol, Dili.
Nia orgulhu, maske foin mak eziste tinan tolu maibe konsege ona halo investigasaun ba kazu korupsaun balun.
“KAK orguilu tanba iha tinan rua, konsege hare ba kazu sira ne’e, halo komparasaun ho Komisaun Anti Korupsaun iha asia pasifik, iha tinan rua nia laran halo investigasaun iha nivel as ne’e seidauk ida,” dehan Komisariu Suares ho orgulhu.
Komisariu KAK mos husu ba entidade hotu atu iha hanoin ida deit hodi kombate korupsaun iha rai laran. “Ita hotu tenke iha hanoin ida deit katak atu kombate korupsaun ne’e sai nudar kultura ida,” sujere Komisariu Suares.
Iha lidun seluk Deputadu Arao Noe hateten, ne’e progresu ne’ebe maka signifika tebes maske foin hamriik iha tinan 2010.
“Ida ne’e hanesan situasaun foun ida, se sira komesa halo servisu no detekta ona kazu provolta de 27 no kazu lima ne’ebe maka to’o ona iha tribunal no hetan ona desizaun, ne’e hatudu susesu bo’ot ida,” gava Deputadu Noe.
Deputadu ne’e mos husu ba governu atu kria kondisaun ne’ebe mak diak ba investigador sira, nune’e sir abele hala’o sira nia knar ho professional liu tan.
