Membru Parlamentu Nasional,Deputada Albina Marcal Freitas dehan hafoin ponte ne’e tohar komunidade sira iha area ne’eba labele lori sira nia produtu ba iha merkadu.
“Ponte ne’e governu presiza ba hare no hadia tanba ponte ne’e importante teb-tebes atu nune’e ita nia komunidade bele asesu ba iha merkadu ria, no asesu ba dalan ne’ebe maka diak atu nune’e sira bele atraveza,” sujere Deputada Albina Marcal Freitas, (11/02), iha Parlamentu Nasional.
Tuir nia, mesmu Governu seidauk bele hadia ponte ne’e iha tinan ida ne’e maibe bele buka dalan alternative seluk, nune’e komunidade sira bele liu.
Nia dehan, ponte ne’e halo kedas iha tempu okupasaun Indonezia, no durante ne’e Governu nunka halo rehabilitasaun ba ponte ne’e.
Entretantu Xefe Dirasaun Ponte Nasional, Arao Vieira katak, sira sei ba halo fiskalizasaun ba iha ponte ne’e, depois hatama relatoriu ba iha Ministeriu hodi aprova osan no bele halo ponte ne’e.
“Ami sei ba foti dadus, karik bele, uja orsamentu jeral 2013 ou mos bele uja orsamentu emergensia, depende tanba primeiru sei ba hare lai ponte ne’e,” dehan Xefe Dirasaun Ponte Nasional ne’e.
