“Ami sei hadia jestaun tiha lai,jestaun tratores sira nebe uluk ami halo distribuisaun ami verifika fali sira nia paradeiru iha ne’ebe, ita hare grupu sira ne’e organizadu diak ona mak ita foin hare fo apoiu fali,” hateten Diretor Nasional Seguransa Alimentar, Gil Rangel, foin lalais iha Parlamentu Nasional.
Diretor ne’e rekonese katak hand traktor ne’ebe durantene’e fahe ba grupu agrikultor sira iha 12 distritus seidauk sufsiente atu halo sira nia natar maibe tinan ida ne’e ministeriu la tau orsamentu ba ida ne’e.
“Proposta ne’ebe iha sei pendenti hela ba hand traktor aserka 10.000 propostas, e ami foin atende 2.500 proposta ba grupu agrikultor sira,ho kriteria ne’ebe mak ami monta grupu ida minimal hamutuk ema nain 10 to’o 15,” esplika Diretor Nasional Seguransa Alimentar ne’e.
Entretantu Prezidenti Komisaun D (ekonomia no dezenvolvementu), Deputada Brigida Correia katak, tinan ne’e la aloka orsamentu ba sosa traktor tanba fahe traktor iha tinan kotuk laiha rezultadu.
“Orsamentu 2013 ba sosa traktor laiha, maibe sosa fini nian iha tokon $3,” hateten Prezidente Komisaun D Parlamentar ne’e.
Iha sorin seluk, Koordenador NGO Study Farming Group, Remigio Laka ne’ebe durante ne’e halo monitorizasaun ba agrikultor sira, katak rezultadu Governu fahe traktor ba Grupu Agrikultor sira inklui suporta balun husi doadores sira hanesan AusAid no Seeds of Life, Distritu Baucau konsege produs hare toneladas 17.
“Mais ami rona katak tinan ida ne’e atu hola tan fini ho orsamentu 3 miloens ne’e ba tempu saida tanba tempu kuda modo ,tempu kuda batar liu tiha ona agora atu ba koileta deit,” Koordenador ne’e preokupa.
