Antes hatama rekursu Fiskalizasaun Conkreta Konstitusionalidade (FCK), Advogadu Kondenada simu ona habeas corpus husi Tribunal Rekursu (TR).
“Depois de estuda ami halo fali rekursu kona ba fiskalizasaun concreta konstitusionalidade ba iha desizaun tribunal ninian, fiskalizasaun ida ne’e kontempla iha ita nia konstituisaun de republika iha artigu 152, oinsa maka ita husu ba tribunal Supremu liu husi plenaria ida atu reve fila fali desizaun sira ne’ebe maka toma tiha ona husi tribunais rekursu no mos desizaun ne’ebe maka hato’o tiha, liu-liu iha habeas corpus,” dehan Advogadu Sergio Hornai, (01/02), iha Colmera, Dili.
Kondenada Lobato rasik hetan kaptura husi Polisia Distritu Dili no lori ba prizaun feto nian iha Gleno, Distritu Ermera, iha loron 21 Janeiru 2013,iha nia rezidensia Bidau, Dili, enkuantu nia Advogadu hatama fali FCK iha dia 31 Janeiru 2013 mos.
Advogadu Hornai dehan, mesmu to’o ikus mai desizaun husi Tribunal Supremu sei nafatin fo desizaun hanesan, ne’e la’os problema importante maka sidadaun hotu-hotu iha direitu atu garante no asegura nia direitu, to’o iha momentu nebe lei la fo ona fatin.
“Iha ne’e maka ita hotu-hotu tenke hakru’uk ba lei tanba lei la fo tan ona dalan,maibe ami mos sei halo fiskalizasaun profunda desizaun ne’ebe juis sira foti, tuir duni faktus ka la’e, tuir lei ka la’e, hare mos sirkuntansia agravantes, hare ba iha provas,” dehan Advogadu ne’e.
Iha lidun seluk Deputada Carmelita Caetano Moniz hateten, esforsu ne’ebe maka Advogadu sira halo ba sira nia kliente, ne’e sira nia direitu ida.
“Ne’e sira nia direitu ne’ebe ke lei fo dalan no fo ba sira, sira bele buka dalan saida deit atu defende sira nia kliente,” dehan Deputada Moniz.
Maibe, tuir nia desizaun hotu-hotu tenke intrega ba Tribunal tanba ne’e nudar sira nia kompetensia.”ita labele interven, husik ba sira deside tuir lei no tuir sira nia konsiensia,” Deputada Moniz katak.
