Medikus foun 430 ne’ebe halo graduasaun iha tinan 2012 iha UNTL, tuir Ministru Saude katak agora dadaun sira hein hela prosesu husi Komisaun Funsaun Publika antes aloka sir aba 13 distritus.
Tuir Ministru Saúde (MS), Sergio Lobo katak sira nia dokumentus ministeriu aprezenta ona ba iha Komisaun Funsaun Publika (KFP) atu deside.
“Sei prosesa hela iha Funsaun Publika bainhira sai ona funsionariu publiku mak ami bele distribui sira ba iha 13 distritus,” dehan Ministru Saude,Sergio Lobo, (05/02), iha Parlamentu Nasional.
Nia dehan, iha Orsamentu Jeral do Estadu (OJE) ministerio propoin $61,508,000 ne’ebe sei fo prioridade liu ba iha kolokasaun medikus ba iha sukus hotu.
“Ne’e mak planu kintu governu konstitusional atu bele garantia povu hotu asesu ba fasilidade saúde,” dehan Ministru Lobo.
Nia hatutan, ministeriu sei esforsu atu kria kondisaun ba medikus sira atu hala’o servisu atendimentu iha sukus hanesan hari residensia ba medikus maibe agora provizoriomente medikus sira bele hela iha populasaun sira nia uma.
Iha parte seluk, Membru Komisaun F (saúde, edukasaun, igualidade jeneru no veteranus), Deputada Ilda Maria da Conçeicão husu atu aselera prosesu ne’e iha KFP, tanba povu iha baze hein hela prezensa medikus sira.
Nia mos preokupa tanba to’o agora ministeriu seidauk rezolve problema hanesan rezidensia ba medikus, parteiras sira ne’ebe atu ba halo atendimentu iha sukus, ida ne’e mak sai kestaun ida bo’ot ba medikus sira atu ba iha baze tanba planu iha la tau orsamentu atu harii residensia ba medikus.
“Imi haruka medikus sira ba servisu ne’e tenke iha rezidensia ida ba sira ne’ebe ho kondisoens,” kestinoa Deputada ne’e.
