“Hau hanoin se deit sei la simu hahalok ida ne’e, hahalok ida ne’e grave tebes krime oho ema hanesan animal, hau hanoin tenke kondena nia ho pena ne’ebe todan tuir lei haruka,” sujere SE Rodrigues ho lian maka’as, (04/02), iha Parlamentu Nasional.
Iha okaziaun ne’e nia mos husu ba entidade hotu atu prevene hahalok ida ne’e liu –liu familia sira tenke proteje, eduka oan feto sira labele husik deit tanba kazu ne’e akontese dala ruma falta atensaun husi familia rasik.
Vitima RS diskunfia hetan oho husi nia kaben rasik ho inisial AL, tanba diskunfia nia fen selingkuh ho mane seluk. Akontesementu ne’e rasik akontese iha 29 Janeiru 2013, komunidade sira iha Metiaut, Dili hetan karon mutin ida namlele hela iha tasi leten ne’ebe ikus mai identifika katak mate isin ne’e feto ida ho idade 17 anos ho naran RS hela iha Taibesi.
Mate isin deskobre ho kondisaun ain liman no kakorok kesi metin,ho kondisaun ne’ebe molik (la tau ropa) tau ba karon mutin laran hodi soe ba tasi laran.
Kazu ne’e rasik agora iha ona polisia Servisu Investigasaun Kriminal (SIC) no suspeitu detein ona iha sela polisia nian hodi hein prosesu tuir mai.
Iha lidun seluk Membru Grupu Feto Parlamentu Nasional (GMPTL), Deputada Carmelita Caetano Moniz hateten nudar feto sente triste tebes bainhira rona no hare informasaun ida ne’e tanba akontesementu ne’ebe bele dehan grave tebes, e husu ba orgaun kompetente atu halo sosializasaun diak liu tan hodi hasae povu nia komprensaun ba lei Violensia Domestika ne’ebe SEPI kria ona.
“Atu ema hotu tauk bainhira involve iha violensia sira hanesan ne’e, husu ba feto foinsa’e sira atu hare didiak bainhira deside partner moris, importante mos familia sira labele obriga oan feto sira atu kaben ho mane ne’ebe deside husi familia rasik,” Deputada Moniz fo sujestaun.
Hatan ba kestaun sira ne’e SE Rodrigues rekonese no promote sei kontinua halo sosializasaun lei Violensia Domestika ne’e ba komunidade sira, liu-liu iha area remotas.
