Ministru Saúde, Sergio Lobo hateten, tuir lei funsaun publika nian, ministru iha kompetensia tomak atu troka kargu director ho ema foun bainhira sira nia mandatu remata.
Nia hatutan, antes ne’e nia mos rona opiniaun husi asesor legal sira iha ministeriu no tekniku sira ba mudansa ida ne’e maibe diretor sira komu okupa kargu ne’e kleur demais, entaun sira hakfodak bainhira halo mudansa.
“Sistema jestaun iha ministeriu saúde ami sei hadia hela maibe la signifika hau troka diretor jeral tanba jestaun mak la diak, prosesu normal iha ministerio nian se okupa kargu liu tiha tempu tenke troka,” hateten Ministru Saúde, Sergio Lobo, (15/02), iha Parlamentu Nasional.
Ministru Lobo mos rezeita deklarasaun ne’ebe eis Diretora Jeral Odete Viegas da Silva katak la pasa informasaun antes hasai nia husi kargu diretora, tanba ministru rasik koalia direitamente ho Doutora Viegas semana rua antes.
Iha parte seluk, Prezidente Komisaun F (saúde, edukasaun, igualidade jeneru, veteranus), Deputadu Virgilio da Costa Hornai katak mudansa ne’e normal tanba kargu xefia ne’e ba tinan rua deit, e ministru iha kompetensia atu hili ema ne’ebe tuir nia iha kapasidade atu kontribui.
“Ida ne’e buat normal ida iha funsaun publika nia laran, laiha tendensia ida katak gosta ka la gosta hanesan ministru tenke hare ona pesoal ne’ebe tuir nia iha duni kapasidade atu fo apoiu servisu ba nia mandatu,” dehan Prezidente Komisaun F Parlamentar ne’e.
