Tuir Vise Ministru Justisa, Ivo Valente katak prizaun ne’ebe maka eziste kedas iha tempu Indonezia ne’e ho kapasitas bele akummula deit prizoneiru 200, maibe realidade agora dadaun Prizoneriu sira nebe maka hela iha prizaun Becora hamutuk nain 300.
Tanba ne’e husi Ministeriu Justisa rasik iha ona planu atu transfere prizoneirus balun ba iha Prizaun Suai ne’ebe iha tempu badak sei rehabilita ne’e.
“Ne’ebe ami hein iha orsamentu jeral do estadu ne’e, bele aprova osan oituan atu ami rehabilita prizaun iha Suai,” dehan Vise Ministru Justisa, Ivo Valente, (01/02), iha Colmera, Dili.
Mesmu iha sela ida ema nain hat to’o lima maibe, tuir nia, durante ne’e nunka mosu problema entre sira.
“Tanba iha prizaun, iha padre sira maka sempre halo bimbingan rohani (leitura) semana-semana ba sira, ne’ebe sira hare malu diak,” dehan Vise Ministru Justisa ne’e.
Alem de ne’e, nia hatutan durante ne’e Prizoneiru sira mos hetan sira nia direitu ba hahan ne’ebe maka diak, fasilidade seluk hanesan sabaun haris no seluk-seluk kompletu hotu, no fo mos sira kapasitasaun.
Iha fatin ketak Prezidente Komisaun A Parlamentar, Deputada Carmelita Caetano Moniz dehan governu presiza hare fali fatin seluk atu nune’e muda balun.
“Ne’e duni ami mos konkorda iha orsamentu jeral ne’e sei aloka orsamentu atu rehabilita prizaun iha Suai,” dehan Prezidente Komisaun A ne’e.
Tuir nia, mesmu sira komete krimi maibe presiza trata sira tuir sentiment umana. n
