“Iha lista veteranus nian ne’ebe ke ativu ne’e kuaze ema nain 90, maibe atu fo sira reforma ne’e hau seidauk bele hasai numeru fiksu tanba ami seidauk reuni para atu halo selesiona, se’e maka atu hetan reforma no rezerva, no se’e maka atu hela,” dehan Xefe Estadu Mayor Jeneral, Lere Anan Timor, (02/02), iha Fatuhada, Dili.
Nia dehan, sira ne’ebe sei hetan reforma, balun tanba idade no balun mos tanba situasaun fisiku ne’ebe maka la sufsiente ona atu bele hala’o sira nia knar nudar military.
“Tanba military ne’e laiha oras, ne’e orden maka manda, dehan ohin-ohin aban-aban, entaun sira labele augenta ba regras no disiplina ne’ebe maka inpoin ba iha institusaun ida ne’e,” tenik Xefe Estadu Lere.
Nia hatutan, sira hirak ne’ebe sei hetan reforma ne’e balun tur iha kargu importente hanesan balun tur hanesan Cabo, Sarjentu, Kapitaun, Major e balun mor tur hanesan ofisiais.
Iha lidun seluk Deputadu Leonel Marcal hateten, durante ne’e sira hatudu duni sira nia kontribuisaun ne’ebe maka diak iha institusaun F-FDTL maibe tanba sira nia idade entaun presiza fo reforma ba sira.
“Ne’e la’os buat ne’ebe maka negative maibe positivu, ita mos hatene katak sira nia kontribuisaun ne’e husi kedas fase resistensia no to’o iha independensia ne’ebe iha tinan naruk teb-tebes, tanba ne’e ita mos hatene katak sira nia idade mos avansadu ona sira presiza atu deskansa” dehan Deputadu ne’e.
