Atu kombate mal-nutrisaun iha rai laran Ministeriu Saúde ho parseirus internasional no nasional hala’o revizaun hodi hadia planu estrategiku ne’ebe sai matadalan ba implementasaun programa nutrisaun.
“Agora dadaun ita nia sosiedade ne’e dinamika beibeik tanba ne’e ita tenke adopta an hodi responde ba situasaun ne’ebe mosu iha komunidade nia le’et atu garantia nutrisaun iha rai laran,” dehan Ministru Saúde, Sergio Lobo, (30/01), iha nia diskursu bainhira abertura diskusaun revizaun planu estrategiku nutrisaun ,iha Hotel Timor, Dili.
Tuir nia, bazeia ba estrategia ne’e mak Ministeriu Saúde (MS) bele halo xamada atensaun ba instituisoen relevante hanesan Ministeriu Agrikultura e Peskas atu garantia sustentabilidade aihan, Ministerio Edukasaun no organizasaun internasional no nasional sira atu servisu makas hodi kombate mal-nutrisaun iha rai doben ida ne’e.
Durante ne’e MS dezenvolve ona programa lubuk ida hodi halo intervensaun ba problema mal-nutrisaun iha teritorio tomak hanesan sensibilizasaun kualidade aihan, distribui aimoruk, vitamina, promove produtu local sira.
Tuir dadus Demography Health Survey ministeriu nian iha 2009-2010 hatudu katak 58% labarik hetan mal nutrisaun kroniku, 19% krekas liu no 45% mak pezu menus.
Vise Primeiru Ministru, Fernando Lasama de Araujo ne’ebe marka prezensa iha serimonia ne’e, husu ba instituisaun hotu atu servisu maka’as no fokus hodi kombate mal nutrisaun iha rai laran tanba servisu mak la masimu.
“Hau hakarak bolu atensaun ba aprosimasaun multi –sektoral, ne’ebe presiza involve no kordenasaun husi setor hot-hotu hanesan agrikultura, saúde, edukasaun no saneamentu atu servisu hamutuk rezolve mal nutrisaun iha nasaun ne’e, tanba tinan ne’e governu fo atensaun maka’as atu redus mal-nutrisaun,” Vise PM ne’e sujere.
Entretantu Reprezentante Unicef iha Timor-Leste, Hongwi Goa hateten saúde no nutrisaun ne’ebe diak sai fundamental ba labarik sira nia kresimentu no ba dezenvolvimentu capital umanu iha nasaun nian tanba ne’e tenke iha planu estrategiku ida ne’ebe responde duni ba situasaun komunidade nian atu asesu ba nutrisaun.
“Unicef supporta ona no sei kontinua apoiu programa saúde no nutrisaun ba labarik sira, liu husi aprosimasaun multi –sektoral ne’ebe iha,” promete Reprezentante Unicef iha TL ne’e.
