Membru Parlamentu Nasional sujere ba Ministeriu Komersiu Industria e Ambiente atu hadia didiak armajen antes sosa produtu local husi agrikultor sira iha rai laran.
“Se imi hola produtu mak imi la tau iha armajen,buat ne’e bele dodok, fos mai la to’o fulan tolu at hotu ona, sai dois ezemplu hanesan dala ida ami ba hare lis asu dois,mina sai iis tiha iha armajen laran, ne’e hau nia esperiensia rasik, la’os koalia arbiru,” kestiona Deputadu Estanislao da Silva, (21/01), iha Parlamentu Nasional.
Deputadu husi bankada Fretilin ne’e kestiona tanba dalabarak produtu local ne’ebe governu sosa tiha tau iha armajen laran, barak mak husi dodok ka at deit.
Hatan ba kestaun ne’e Ministru Komersiu Industria e Ambiente (MKIA), Antonio da Conceicao katak ministeriu propoin ona orsamentu atu estabelese Sentru Lojistiku Nasional (SLN) nune’e produtu local ne’ebe sosa husi agrikultor sir abele rai iha fatin ne’e.
“Ida ne’e buat ida ne’ebe mak foun ne’ebe Ministeriu ne’e propoin atu hare liu-liu kona ba sa produtu deit mak ita presiza,” dehan Ministru MKIA ne’e.
Iha mos objetivu husi estabelesementu SLN ne’e mak atu halo rezerva nasional bainhira Timor-Leste la dependensia ona ba importasaun husi liur.
Ministru ne’e dehan, sentru ne’e nia regulamentu inklui prepara lei no jestaun mai husi MKIA.
“Maibe jestaun ida loro-loron ninian ne’e la’os ona funsionariu no la’os ona ministeriu maibe ne’e ba iha emprezariu ruma ne’ebe mak iha kapasidade finanseira no kapasidade jestaun atu administra sentru lojistika nasional ne’e,” tenik Ministru da Conceicao.
