Iha kursu lian Portugues ne’e Volunteer sira husi NGO Ba Futuru uza meius hanesan kanta, dansa tradisional, pinta, konta istoria, jogus ne’ebe ho lian Portugues hotu, ida ne’e hanesan animasaun ba labarik sira atu sira bele sente sira iha ambiente ne’ebe diak hodi aprende buat ruma liu-liu lian Portugues.
“Sira sei la hetan sertifikadu, sira so aprende deit oinsa konese sasan sira nia naran ho lian portugues no halo konversasaun ba malu,” dehan Koordenadora Projeitu NGO Ba Futuru, Juliana de Oliveira Marços, (24/01) iha Comoro, Dili.
Kursu ne’e loke iha tinan kotuk liu ba, kuaze labarik lubuk ida mai aprende iha ne’e e agora dadaun iha nain 20 resin mak lor-loron sei tuir nafatin formasaun ne’e tanba sira preokupa ho sira nia eskola entaun sira balun la mai. “Tempu feriadu mak labarik sira mai barak,” dehan Koordenadora ne’e.
Entretantu Prezidente Conselho Nasional Joventude Timor-Leste (CNJTL), Leovigildo Hornai hateten ho era globalizasaun ida agora, tenke priense ho siensia, matenek, kreatividade no skill tanba importante tenke investe makas iha seitor edukasaun liu –liu ensino baziku sira hodi garantia kualidade rekursu humanu ba nasaun ida ne’e iha futuru.
“Hau nia hanoin ho situasaun Timor-Leste, konseitu siensia ne’e importante maibe tenke konfirma mos ho integridade valores espiritual tanba ema matenek deit laiha moral ne’e problema bo’ot,” dehan Prezidente CNJTL Hornai.
