“Hau fo ezemplu ki’ik ne’ebe hau rasik hare ho matan, estrada husi Tunubibi ba Maliana kota foin mak entrega, seidauk to’o fulan rua maibe nakloke hotu tiha ona,” kritika Deputadu Mateus de Jesus, (10/01), iha Parlamentu Nasional.
Nia hato’o kritikas ida ne’e tanba relatoriu annual ezekusaun OJE 2012 ne’ebe kada ministeriu hato’o iha Parlamentu mesaka diak hotu, maibe iha implementasaun seidauk masimu.
Tuir nia, kada tinan governu halo ezekusaun orsamentu ne’ebe bo’ot maibe iha pratika seidauk fo benefisiu ba povu.
Nia dehan, ida ne’e akontese tanba govenru la halo kontrolu ba emprezariu sira ne’ebe manan tiha tenderizasaun no hala’o projetu sira ne’e.
“Buat sira ne’e sai sasukat ida atu aprova orsamentu kada tinan tenke hare mos nia implementasaun iha baze, fo duni benefisiu ba povu ka la’e,” tenik Deputadu husi bankada Congresu Nasional Rekonstrusaun de Timor (CNRT) ne’e.
Entretantu Diretor Ajensia Dezenvolvementu Nasional(ADN), Samuel Marcal informa katak, governu sei la halo pagamentu ba kompania ne’ebe kaer projetu maibe laiha kualidade.
“Signifika katak fo tempu ba sira hadia tiha lai buta ne’ebe mak at,depois sira hadia tiha hotu entaun rekomenda nafatin atu selu sira,” dehan Diretor ADN ne’e.
