“Ita nia sistema edukasaun mak la’o ladun furak tanba professor sira halo pasa deit maske alunus ne’e la hatene lee,” dehan Deputadu Antonio Serpa Dadonus, (25/01), iha Parlamentu Nasional.
Tuir nia, lolos profesores sira tenke hanorin sira halo sira sai matenek, maibe husik sira pasa deit maske la hatene lee.
Alende ne’e nia hatutan, dalaruma estudante sira ameasa fali professor sira maske sira la hatene buat ida.“kuandu sira naik klase ne’e sira konfia deit maibe kuandu la pasa sir abele tuda eskola ou bele sona mestre sira,” dehan Deputadu husi bankada Congresu Nasional Rekonstrusaun Timor (CNRT) ne’e.
“Ida ne’e hau hetan barak, iha SMP mos hau hetan balun lee la hatene mais tanba sa mak ba hotu iha SMP no mos SMA mos hau hetan hotu, tanba uluk hau hanesan professor ida hanorin iha eskola ensino baziku iha dsitritu Baucau no Manatuto,” dehan Deputadu ne’e.
Deputadu ne’e preokupa tanba estudante iha kuarta klase barak mak seidauk hatene lee.
Entretantu Deputada Maria Adozinda Pires ne’ebe sai mos membru Komisaun F Parlamentar, husu atu labele jeneraliza deit estudante la hatene lee maibe presiza halo peskiza ida ne’ebe klaru.
Iha fatin hanesan Membru Komisaun F, Deputada Maria Adozinda Pires da Silva informa,labele halo jeneralija dehan estudante kuarta klase la hatene le’e.
“Peskiza ida ne’ebe ke formal para ita hare no hatene lolos,” Deputada ne’e sujere.
Enkuantu Ministru Edukasaun, Bendito Freitas rekonese katak iha estudante balun seidauk hatene lee.
“Iha Dezembru tinan kotuk vise ministra da edukasaun organiza hamutuk ho gabinete primeiru ministru Natal hamutuk ho labarik eskola sira, bainhira primeiru ministru bolu labarik nain rua sae iha palku,
haruka sira lee surat tahan ne’ebe fob a sira maibe sira la hatene lee, hau lahatene sira kuarta klase ka la’e,” dehan Ministru Freitas.
Iha momentu ne’eba nia dehan, Primeiru Ministru husu kedas responsabilidade Ministeriu Edukasaun nian e ida ne’e dezafiu bo’ot ida. “La’os deit iha kuarta ano maibe mos iha sestu ano, ne’ebe dezafiu bo’ot ida, halo oinsa para ambitu de leitura iha eskola organiza nune’e bele sai diak liu tan,” Ministru Edukasaun ne’e esperansa.
