Ministru Edukasaun, Bendito Freitas esklarese katak area despejas espesifikas ba salariu vensimentu hamutuk kuarenta sete milioens kuatru mil dolares, ba bens servisu nian hamutuk $38,239 mil,
transferensia publika iha $2.500 mil, kapital menor $4.014 mil no kapital dezenvolvimentu $4.367 mil.
“Husi kategoria salariu e vensimentu ho montante $47 milioens e 4 mil ne’e atu prosesa fo apoiu pagamentu salaries ba funsionarius admistrativus iha nivel nasional no distrital husi ministeriu da edukasaun ne’ebe hamutuk iha 1.120 (mil sentu e vinte) no mos privizaun ba vagas ne’ebe sei iha atu priense tan 260 vagas, inkui mos atu selu profesores hamutuk nain 12.777 pesoas,” dehan Ministru Freitas, (18/01), iha Parlamentu Nasional.
Entretantu Membru Komisaun F ne’ebe trata asuntu Edukasaun, Saude no Igualidade Jeneru, Deputadu Paulino Monteiro kestiona mos kona ba kondisaun eskola ne’ebe tempu Indonezia nia kedas ne’ebe at maibe to’o ohin loron seidauk hadia.
“Ami komisaun F ne’ebe toma konta kona ba Infrastrutras ami hakarak ita bo’ot sira fo oituan kona ba konstrusaun eskola fizikus ne’ebe ohin loron la’o balun halo hotu no balun la halo hotu, pursentu hira mak hotu no pursentu hira mak la hotu,” Deputadu Monteiro husu esplikasaun.
Iha fatin hanesan membru seluk husi Komisaun F, Deputada Maria Adozinda Pires da Silva husu ba Ministeriu bele hadia diak liu tan setor edukasaun ho orsamentu ne’ebe iha.
“Edukasaun tenke iha kualidade eskola, programa merenda eskolar, infraestrutura, rejime kareira profesor nian inklui kona ba profesor voluntariu sira ne’ebe to’o agora seidauk resolve, kuandu edukasaun diak nasaun sai forte,” dehan Deputada ne’e.
