“Hau labele fo data fiksu maibe iha tempu badak ami sei halo lansamentu ba rezultadu ne’e,” dehan Sekretaria Estadu Idelta Maria Rodrigues, (15/01), iha Parlamentu Nasional.
Peskiza ne’e hala’o iha distritu Ainaro, Aileu no Ermera iha tinan 2011, ho objetivu atu responde ba prekoupasaun komunidade sira nian kona ba feto barak sai husi eskola (lakonsege akaba) tanba isin rua.
Tanba ne’e SEPI servisu hamutuk ho Ministeriu Edukasaun (ME), movimentu feto no organizasaun internasional hanesan CARE Internasional deside halo peskiza ida, atu identifika lolos kauza ne’ebe halo sira la akaba sira nia estudu.”nune’e ministeriu edukasaun bele foti desizaun no fo atensaun ba kestaun ne’e,” reforsa SE Rodrigues.
Iha parte seluk Diretora Ezekutivu Rede Feto, Jacinta Luziha hateten nudar organizasaun ne’ebe luta ba direitu feto, sira kontinua halo advokasia ho ME, liu-liu oinsa mak bele kria politika ida atu feto sira ne’e bele tama fali eskola.
“Eskola hotu-hotu bele simu fila fali estudante sira ne’ebe drop out atu kontinua sira nia estudu to’o remata tanba ida ne’e nesesidade baziku no direitu labarik sira hotu nian atu hetan edukasaun,” dehan Diretora Ezekutivu Rede Feto ne’e.
Husu Ministeriu Edukasaun atu kria mos mekanismu ida hodi garantia laiha violensia oi-oin ne’ebe hasoru labarik feto sira iha eskola durante prosesu aprendizajen nune’e bele prevene labarik sira sai husi eskola.
