“Sira nia kazu ne’e diferente, balun abandona servisu, no balun tanba prosesu disiplinar,” dehan Prezidente KFP, Komisariu Liborio Pereira, (10/01), iha Dili.
Nia dehan, tuir lolos prosesu ne’ebe maka tama iha tinan 2012 ne’e liu 200 pesoas (atus rua), maibe kazu balun iha hela prosesu.
“Balun sei halo fali rekursu, balun hetan duni sansaun, balun hetan demisaun de aktividade, balun hetan suspensaun, balun mos hetan absorvisaun tanba laiha evidensia ne’ebe forti atu akuza sira lolos katak sira salah,” Komisariu KFP ne’e katak.
Tuir nia, prosesu disiplinar ne’ebe maka husi KFP halo ne’e positivu tebes tanba ho asaun sira hanesan ne’e bele muda mos ema nia attitude ne’ebe ladun hala’o sira nia knar ho diak iha servisu fatin.
Entretantu Deputadu Pedro da Costa hateten, ne’e hanesan meius ida atu eduka Funsiunariu sira seluk, nune’e sir abele servisu ho diak liu tan.
“Funsaun publika tenke ezerse nia funsaun ho didiak atu eduka ita nia ema sira ne’ebe ke ita konsidera hanesan makina estadu tenke servisu ho diak atu garante institusaun governu ne’ebe maka ita iha ona,” Deputadu ne’e suporta.
