Atu klarifika informasaun kona ba kapturasaun ne’e, Jornalista tenta halo kontaktu ho Komandante Polisia Distritu Dili, Superintendente Pedro Belo, maibe nia rezeita no lakohi fo komentariu sobre asuntu ne’e. “Hau laiha komentariu kona ba ida ne’e,” dehan Komandante Pedro Belo, via telephone,(23/01) iha Dili.
Kapturasaun ne’e rasik hala’o iha loron Tersa-feira, dia 22 Janeiru 2013, tuku 04:00 lokraik iha nia rezidensia, Bidau, Dili.
Kondenada Lobato tama prizaun ho kazu halo kolusaun ho kompania kona ba tenderizasaun iha 2009 atu hari edifisiu ualu (8) ho montante $ um miliaun no asina dokumentu falsu.
Entretantu Organizasaun Judisial System Monitoring Program (JSMP) ne’ebe durante ne’e halo observasaun no monitorizasaun ba sistema judicial apresia tebes ba kondenada Lobato hodi kumpri sentensa ne’ebe tribunal fo ba nia.
“Nia kumpri no voluntariamente entrega an ba polisia, ne’e buat ne’ebe maka ita tenke apresia, ne’ebe ita hotu konsidera katak kualker desizaun tribunal ninian folin ga valor ne’e ho kualidade ne’ebe mak as liu desizaun politika sira seluk” apresia Diretor JSMP, Luis Oliveira Sampaio.
“ Durante ne’e ita mos akompania lamentasun husi senhora Lucia, maibe to’o ikus nia kumpri duni desizaun ne’ebe maka fo ba nia,” .
Tuir nia, mesmu nia (Lobato) tama ona prizaun, maibe advogadu husi kondenada sei prepara hela reklamasaun balun hodi hatama fali ba Tribunal Rekursu, tanba ladun satisfeitu ho desizaun tribunal nian.
“Tanba panel ne’ebe maka julga ka reseita sira nia pedidu rekursu extra ordinariu ne’e mai husi ema hanesan, ne’e buat ida ne’ebe maka antes ne’e hau preokupa mos katak, hau fiar kuandu sei panel ne’e troka ne’e kemungkinan bele iha rezultadu seluk, mais panel ne’e hanesan entaun rezultadu mos kontinua hanesan,” dehan Diretor JSMP ne’e.
Iha lidun seluk, Deputadu Arao Noe hateten, ne’e asaun ne’ebe mak pozitivu e espera katak sidadaun hotu bele banati tuir.
“Nia la halo balizasaun ba nia an, nia hatene katak nia salah ba kazu ne’ebe maka nia rekere, nia aprezenta an ba polisia no lori ba kadeia, ne’e nudar parte positivu, hau esprea katak ema hotu bele iha sentiment ne’ebe hanesan,” Deputadu Noe katak.
Entretantu Advogadu Lucia Lobato, Jose Pedro Camoes hateten, husi parte advogadu sei prepara hela reklamasaun ida, hodi hato’o ba Tribunal Rekursu tanba juis ne’ebe hanesan maka foti fali desizaun inkonstitusionalidade, no reklamasaun ne’e sei entrega aban e espera katak antes fin de Fevereiru sei mosu pedidu revizaun.
