“Hau hanoin ida ne’e buat ida diak,Timor bele orgulhu, tanba Timor oan ne’ebe nomeadu husi Sekretariu Jeral Nasoens Unidas nian sai reprezentante especial ba Guine Bissau,” dehan Deputadu Estanislao da Silva ho orgulhu, (07/01), iha PN.
Deputadu ne’e rekonese katak, Horta merese duni atu hetan fiar ida ne’e tanba nia ema ida ne’ebe ke esperiensia barak iha area diplomatika no esperiensia mos fasilitasaun Timor ninian, hodi halo mediasaun ba problema ne’ebe nasaun ne’e infrenta.
“Maibe ida ne’e la depende totalmente ba senhor Jose Ramos Horta, depende liu-liu mos ba Guine Bisau oan sira, sira mak tenke hatudu maturidade, tenke tau interese nasional as liu duke interese sira seluk nune’e bele hetan paz iha sira nia rain,” Deputadu husi bankada Fretilin ne’e katak.
Nasaun Guine Bissau, tuir nia iha tempu Timor luta hodi hetan ukun rasik aan, sira fo apoiu maka’as atu Timor bele hetan independensia.
“Hau hanoin ita mos agora labele husik sira,” Deputadu ne’e fo hanoin.
Iha fatin hanesan Deputadu Pedro dos Martires da Costa dehan, nomeasaun ba Doutor Ramos Horta sai reprezentante especial nudar Sekretariu Jeral iha Guine Bissau hatudu katak, mundu rekonese lideransa Timor nian.
“Onra ida ba ita povu Timor, ita nia ema ida ONU fiar nia kapasidade atu ba xefia iha Guine Bissau,” dehan Deputadu husi bankada Congresu Nasional Rekonstrusaun de Timor (CNRT) ne’e.
Alende ne’e tuir nia, Guine Bissau mos nudar belun diak ida tanba ne’e importante tebes kontinua fo solidariedade ba malu.
“Sira agora ne’e iha krize ekonomiku,sosial barak iha neba, hanesan povu ida ita tenke ser buka nafatin solidariedade ba sira nia problemas atu oinsa hasai sira husi krize,” Deputadu ne’e esperansa.
“Hau pesoalmente optimista purque nia, ninia lideransa hamutuk ho ita nia maun bo’ot Kay Rala Xanana Gusmao iha luta libertasaun, nia hela iha liur ne’eba politika diplomatiku ida ne’ebe ke maka’as, diak konsege konkista simpatia komunidade internasional ne’ebe mak mai apoia ita,” Deputadu da Costa tenik.
Entretantu Xefe bankada Partidu Demokratiku (PD), Deputada Maria Lurdes Martins de Sousa Bessa hateten, nomeiasaun ida ne’e importante no adekuadu tebes tanba nia ( Ramos Horta) iha konesementu diak ba situasaun iha Guine Bissau.
“Doutor Ramos Horta sai modelu ida ba ita nia jerasaun foun atu banati,” Deputada ne’e esperansa.
Maske nune’e Deputada ne’e afirma, situasaun iha Guine Bissau komplikadu tebes, la’os deit konflitu inernu maibe mos fator esternu ne’e duni misaun ne’ebe nia hasoru sei difisil. “Maibe hau optimista katak ho maneira ramos ninian bele hakat pasu ida ba oin,”.
