“Iha parte energy hanesan saude no edukasaun, ba area ne’e iha posibilidade atu bele ajuda, liu – liu iha parte edukasaun ne’e tama ona iha konkordansia,” informa Embaixador Venezuela iha Timor-Leste, Nelson Davila, hafoin hasouru malu ho Prezidente da Republika, Taur Matan Ruak, (08/01), iha Palasiu Prezidente Nicolao Lobato, Bairo-Pite, Dili.
Alende ne’e nia dehan,iha mos posibilidade seluk ne’ebe Timor iha hanesan ho Venezuela mak kona ba mina.
Iha sorumutu ne’e,alende koalia kona ba relasaun bilateral, Embaixador Davila mos informa ba Xefe Estadu kona ba situasaun ka kondisaun Prezidente Venezuela, Hugo Chaves paska operasaun kankru ne’ebe nia hala’o.
“Hau simu preokupasaun husi prezidente rasik kona ba kondisaun saude husi prezident Chavez, e agora diak oituan ona no seluk tan ami koalia kona ba kooperasaun bilateral assitensia entre Venezuela ho Timor-Leste inklui relasaun diplomatic,” Embaixador Davila tenik.
Prezensa Embaixador Venezuela rasik iha Timor-Leste halo ona tinan ida ho balun no “hau espera bele hanaruk tan ba fulan hirak liu tan no bele ba tinan mos,” dehan Embaixador Venezuela ne’e.
Iha lidun seluk Deputadu Virgilio Hornai hateten, ne’e kooperasaun ne’ebe mak diak hodi ajuda Timor-Leste iha area rua ne’e.
“Maibe hau gosta liu wainhira sira ajuda iha parte forensic ninian no buat sira hanesan ahli bedah hanesan halo operasaun tanba ita nia espesialista sira iha ne’e menus teb – tebes ne’ebe intermus kooperasaun bilaterais bele mos hare ba parte ida ne’e,” Deputadu husi bankada Partidu Demokratiku (PD) ne’e dehan.
