Tuir nia Deputadu Francisco Branco husi bankada Fretilin katak, kompara tinan kotuk OJE ba tinan ida ne’e ho montante ne’ebe bo’ot no presiza tempu atu estuda didiak proposal ne’e antes halo debate.
“Tuir regras orsamentu nian, lolos sira hatama proposta orsamentu jeral du estadu ba Parlamentu desde fulan Outubru, maibe ate agora laiha, tanba sa ami la hatene,” preokupa Deputadu Branco, (07/01), iha Parlamentu Nasional.
Entretantu tuir Deputada Maria Adozinda Pires da Silva hateten,proposta OJE 2013 tama tarde iha Parlamentu Naisonal tanba feriadu loron bo’ot Natal no tinan foun nian.
“Prosesu hatama tiha ba meja parlamentu nasional iha 19 Dezembru depois dia seguintes prezidenti baisa tiha mai komisaun finansas publika,depois ida ne’e periodu tama ba natal,entaun ita feriadu,” dehan Deputada husi bankada Frente Mudansa ne’e.
Deputada ne’e dehan, tuir planu OJE ba 2013 sei halo diskusaun iha Parlamentu Nasional iha fulan Fevereiru nia laran, tanba iha tempu badak Deputadus sira sei tuir hotu workshop kona ba orsamentu jeral ne’e, hafoin ne’e Komusaun C sei halo audensia publikas to’o fin de Janeiru.
“Dia kuatru to’o dia seis Fevereiru kuandu buat sira ne’e la’o tuir planu ami sei halo diskusaun orsamentu jeral do estadu jeneralidade,” Deputada ne’e tenik.
Nia dehan, prosesu diskusaun jeneralidade sei halo durante loron tolu hafoin tama ba espesialidade no tama ba final global.
Iha fatin hanesan Deputadu Paulino Monteiro katak, proposta OJE ba 2013 nian agora dadaun iha ona Deputadus sira nia liman hodi estuda daduk proposta orsamentu ne’e.
“Hau hanoin atu diskuti lolos iha Parlamentu bele tama iha fulan Fevereiru nia laran karik,” dehan Deputadu husi bankada Partidu Demokratiku ne’e (PD).
