“Foin lalais Parlamentu husu atu aloka tan orsamentu $ 14 mil ba labarik sira iha ne’eba, ita prosesa ona transfere ona ba konta bankaria Embaixador Timor-Leste iha Malaysia atu fo ba labarik sira, ba oin MSS hanoin atu kopera ho Ministerio Edukasaun no Sekretario Estadu Veteranus hodi deskute futuru labarik sira ne’e nian tanba sira tama ona iha Ensino Superior,” dehan Xefe Protesaun Labarik Ministerio Solidaridade Sosial, Florencio Gonzaga, foin lalais, iha Ministerio Negosio Estrangeiru, Pantai Kelapa, Dili.
Labarik nain 14 ne’e uluk hela iha Orfanatu Fundasaun Hadomi Timor Oan iha Pantai Kelapa maibe tanba governu la suporta sira, Maria da Costa nudar Responsavel FHTO ho nia kaben ema Malaysia sente preokupa ho kondisaun moris labarik sira nian entau sira fasilita labarik sira hodi aranka ba iha Malaysia iha tinan 2008.
Xefe Gonzaga dehan, kondisaun labarik sira ne’e agora dadaun diak hotu, iha nain rua mak hala’o hela estajiu iha Kompania Petro Max Malaysia, ida seluk iha cabang kompania iha Indonezia, enkuantu nain 12 agora tama hotu ona iha Ensino Superior.
“Hau fiar katak labarik sira ne’e sei fila mai Timor tanba sira sidadaun Timor-Leste, sira uza pasaporte Timor-Leste nian sira ba iha ne’eba tanba situasaun mak fasilita sira ba iha ne’eba,” dehan Xefe Gonzaga hafoin ba vizita sira iha Malaysia, fulan kotuk.
Nia informa katak, labarik nain 14 ne’e kompostu husi feto nain sia no mane nain lima, e husi sira ne’e nain hat mak veteranus sira nia oan, sira hetan bolsu estudus husi governu hodi bele kontinua iha nivel alto, enkuantu sira seluk governu sei la taka matan.
Entretantu Komisaun Nasional ba Direitu Labarik (KNDL), Komisaria Adalgisa M. S. Ximenes katak governu tenke akompanha sira tantu sira nia edukasaun, saúde no seluk tan maibe informasaun ne’ebe diak tebes tanba labarik sira ne’e hetan atensaun ne’ebe diak husi ema ne’ebe lori sira ba to’o sira asesu hotu ba edukasaun no sira nia kondisaun saúde mos diak maibe ba oin governu tenke tau atensaun ba labarik sira ne’e.
“Kestaun mak labarik sira ne’e iha ema nia rain tanba ne’e ita nia governu tenke hola responsabilidade ida atu hatete katak ne’e ita nia ema atu nune’e labarik sira ne’e bele fila fali mai Timor-Leste,” dehan Komisaria Ximenes.
KNDL sei servisu hamutuk ho MSS atu hato’o relatorio ba iha Ministerio Edukasaun hodi hare asuntu ida ne’e tanba labarik sira ne’e maioria tama ona iha Ensino Superior hodi garantia labarik sira ne’e bele fila mai Timor-Leste.
