“Ne’e presiza tanba parese ba ema sira ne’ebe maka laiha problema, sira hanoin laiha buat ida wainhira tribunal ne’e estabele ga lae, maibe hanesan sira ne’ebe hasoru kazu ho karakter bo’ot , ne’e iha nesesidade duni atu ba iha tribunal supremu tanba dalaruma la satisfeitu ho desizaun husi tribunal rekursu,” dehan Diretor Ezekutivu JSMP, Luis de Oliveira Sampaio, foin lalais, iha nia knar fatin Colmera, Dili.
Diretor ne’e mos hare no observa katak ate agora governu seidauk iha planu ida atu kria Tribunal Supremu da Justisa, maske nune’e nia husu atu halo rekrutamentu ba graduadu sira ne’ebe eskola iha Fakuldade Direitu iha Universidade Nasional Timor Lorosa’e (UNTL), “nune’e bainhira tribunal ida ne’e estabelese ita iha ona rekursu ne’ebe sufsiente e presiza juis lubuk ida hodi toma konta ba ida ne’e,” Diretor Ezekutivu JSMP ne’e reforsa.
Tuir nia, mesmu ke iha difikuldade barak mak Timor hasoru maibe ba future presiza hari tribunal ida ne’e tanba kuaze nasaun hotu iha.
Entretantu Deputadu Estanislau da Silva hateten, kestaun ne’e importante duni maibe agora seidauk bele tanba sei hasoru difikuldade lubuk bo’ot ida ne’ebe presiza hadia uluk.
“Ita nia kbi’it seidauk iha atu hari tribunal supremu, tanba atu kria buat ne’e ita tenke iha juis esperientes, no tenke iha mos kondisoens atu nune’e sira bele hala’o sira nia knar,” dehan Deputadu husi Bankada Fretilin ne’e.
Karik ba future loke Tribunal ne’e, Deputadu ne’e sujere Governu bele haruka Timor oan balun ba estuda iha Portugal tanba sira iha tiha ona.
