“Ami hato’o ami nia lamentasoens sira ne’e tanba komunidade iha bairo-bairo kuaze kalan – kalan sempre iha vogetis lian, ita iha komunidade balun ne’ebe maka iha bebe, iha mos ema isin rua, no iha mos ferik katuas sira sempre hakfodak iha tempu kalan, ne’ebe sira husu atu koalia iha parlamentu no ba polisia sira atu bele kontrola sasan sira ne’e,” kestiona Deputada Ana Ribeiro, iha Parlamentu Nasional.
“La’os dehan labele sunu, maibe sunu buat ne’e iha nia tempu hanesan natal ou loron surpreza ruma.”
Tanba ne’e polisia tenke halo atusaun ba kondisaun ne’e tanba liu husi vogetis ne’e mos bele hamosu instabilidade wainhira iha pihak ketiga aproveita kondisaun ne’e, tanba “ita hare iha parte seguransa ita rona dehan kilat lakon, ema ne’ebe maka hanoin at bele aproveita vogetis tarutu ne’e tiru fali ema, ita la hatene, ne’e ita identifika kusta,” Deputada ne’e preokupa.
Iha lidun seluk Secretariu Estadu Seguransa (SES), Francisco Guterres hateten, ne ‘e la’os deit responsabilidade polisia nian maibe entidade tomak.
“Kestaun maka ne’e primeiru ami tenke liga ho ministeriu seluk hanesan Ministeriu Comersiu Industria kona ba kompras sasan sira ne’e, tanba polisia labele determina ida ne’e bele sosa ga la’e, ne’e kompetensia ministeriu comersiu nian, tanba ne’e maka ami tenke koopera ho sira,” dehan Secretariu Estadu Seguransa ne’e.
Maske nune’e tuir, Governu hahu halo kontrola ba vogetis sira ne’e tanba alende taurutu hatauk komunidade sira mos bele estraga ema nia vida.
