“Ne’e hanesan projeitu balun DAP sei apoiu iha tinan 2012-2013, e Embaixada Australia sei fo dollar Australianu rihun atus ida ba komunidade ho NGO sira liu husi DAP, atu tulun dezenvolvementu komunidade,” hateten Embaixador Australia, Mile Armitage, foin lalais iha serimonia entrega cheque ba benefisiarius sira, iha nia Rezidensia Pantai Kelapa, Dili.
Embaixador ne’e dehan, aplikasaun ba DAP support ne’e loke ba publiku, invidu, grupu ka organizasaun ne’ebe hakarak fo kontribuisaun ba dezenvolvementu nasaun ida ne’e.
Benefisiarius sira ne’e pasa ho kriterius ne’ebe konsidera sira nia projeitu ne’e bele servi duni ema barak no fo benefisiu ba publiku, liu-liu komunidade sira husi projeitu ne’ebe iha.
Projeitu hirak ne’e mak hanesan hari sentru ba inan feto sira, hodi sira bele hala’o sorumutu no atividade ba saude, suku roupa no hena, ho krexe ba labarik sira iha komunidade Natarbora, iha Manatuto. Nune’e mos fo apoiu ba NGO iha Oe-Cusse atu hamenus violensia kontra feto no labarik sira, liu husi atividade edukasaun legal hodi haberan lei Violensia Domestika Timor-Leste nian, hadia
saneamentu no hamoos meiu ambiente ho konstrusaun foer fatin iha Maliana, tulun sentru ospitalidade foun ida iha Atauru, nune’e bele fo treinamentu no fo oportunidade servisu, ne’ebe mos bele ajuda ba komunidade nia moris, haberan asesu ba bee no saneamentu liu husi konstrusaun posu be, sintina iha Oe-Cusse, Manatuto no Viqueque inklui asiste dezenvolvementu ba negosiu social ne’ebe sei fo bee ba iha resiklajen botir plastiku baratu liu no sei hamoris empregu local no sei hamenus uzu bee botir plastiku iha komunidade Maliana.
Distritu lima ne’e mak hanesan distritu Dili, Sub-distritu Atauru, Bobonaro, Oe-Cusse Viqueque no Distritu Manatuto.
Entretantu Benefisiaria Leopoldina dos Santos hanesan mos Koordenadora ba Projeitu Pengisian Agua Galon iha Sub-distritu Maliana, sente kontente tanba sira nia proposal bele pasa nune’e sir abele hala’o projeitu ne’ebe planea tiha ona.
“Ami hili projeitu ida ne’e atu ajuda komunidade sira tanba durante ne’e ita nia komunidade sira sosa bee agua iha merkaduria karuun los, liu-liu iha Maliana kada agua gallon ida troka deit dollar tolu, sosa foun 12 dolar, maibe ho ami nia projeitu ne’e ami sei hatun folin dollar rua deit,” hateten Koordenadora projeitu ne’e.
Total orsamentu ne’ebe sira hetan ba projeitu ne’e hamutuk $4.393.30 no esperansa katak liu husi sira nia projeitu ne’e bele ajuda ona komunidade sira ne’ebe durante ne’e konsumu bee agua gallon.
Sentementu hanesan mos hato’o husi Benefisiariu Osaias Soares, hanesan mos Diretor Ezecutivu Move Forward NGO iha Atauru, katak ho apoiu ne’ebe iha sira sei hari sentru ospitalidade ida iha Atauru inklui sai fatin treinu ba estudante sira ne’ebe hakarak atu hatene servisu ospitalidade no turismu nian ne’e oinsa.
“Sira bele pratika iha sentru ne’e oinsa servi ema, oinsa mak sira bele simu bainaka, tanba agora ita nia komunidade barak la hatene oinsa atu halo servisu ida ne’e,” hateten Benefisiariu ne’e.
Diretor NGO Move Forward ne’e esperansa, katak ho ajudus ida ne’e bele halo sustentabilidade ba komunidade sira, liu-liu komunidade Atauru sira nia moris ho diak liu tan, no husu mos ba Embaixada Australia atu kontinua DAP support ne’e iha future.
Programa DAP support la’os implementa iha Timor-Leste maibe ne’e programa dezenvolvementu global ne’ebe implementa iha nasaun foin dezenvolve e iha Timor rasik hahu implementa desde nasaun ne’e hetan independensia no hetan rezultadu diak husi implementasaun ba dahuluk sira hanesan susesu dada bee moos, hari sintina ba komunidade sira no seluk tan.
