“Importante tebes tanba ita hare dadus ne’ebe iha katak numeru feto afetadu HIV/SIDA kada tinan sa’e entaun ami foti desizaun katak tenke halo fiskalizasaun atu bele hetan dadus lolos ema hira mak involve iha vida pratika prostituisaun, nia factor no hira mak afetado HIV/SIDA tanba problema sira ne’e fo ameasa bo’ot ba nasaun,” dehan Membru Komisaun F, Deputada Maria Adozinda Pires da Silva, foin lalais iha Salaun Delta Nova, Comoro, Dili.
Maske dala barak feto sira ne’ebe involve iha vida ida ne’e tanba ho razaun ekonomia maibe tuir nia sei iha dalan barak atu resolve problema ekonomia iha uma laran.
“Prostituisaun la’os dalan uniku atu hetan osan tanba Timor –Leste iha nia kultura rasik, prostituisaun hatun dignidade feto Timor nian no fo impaktu bo’ot ba saúde ema ida-idak nian no ba nasaun doben ida ne’e,” dehan Deputada ne’e.
Iha parte seluk Vise Prezidente GMPTL, Deputada Albina Marçal Freitas hateten importane tebes atu halo fiskalizasaun nune’e bele iha identifikasaun ne’ebe klean kona ba feto hira mak involve iha aktividade ne’e tanba dala barak rona maibe seidauk kaer ho liman entaun difisil atu koalia asuntu ida ne’e.
“Ita seidauk iha identifikasaun ne’ebe klean ba feto hira mak sai prostitute, hau mos rona maibe ita seidauk kaer, hau hanoin dala barak faktores primeiru mak ekonomia no dalaruma joven sira interpreta sala sistema teknologia modernu ne’ebe iha, entaun sira monu lalais ba aktu sira hanesan ne’e,” dehan Deputada Freitas.
