Serimonia aniversariu Dom Boa Ventura ba dala 100 ne’ebe hala’o iha Aldeia Luak, Suku Daisua, Distritu Manufahi, atu fo hanoin fila fali luta Dom Boa Ventura nian ne’ebe mak halo hasoru kolonialismu Portugues iha tinan 1912 to’o tinan 1974.
“Tanba ida ne’e mak estadu ho nia planu, halo oinsa mak ita hamoris fila-fali historia ne’e atu bele hametin historia ne’e,” dehan Reprezentante Ministeriu Administrasaun Estatal, Lino de Jesus Torasao, foin lalais iha selebrasaun loron tinan 100 iha Aldeia Luak, Suku Daisua, Distritu Manufahi.
Nia dehan, prosesu hari monumentu ba Dom Boa Ventura nian ne’e tama iha planu estratejia husi Governu Aliansa Maioria Parlamentar (AMP) to’o mai iha V Governu, oinsa atu jerasaun foun sira bele hatene historia Dom Boaventura nia luta.
Dom Boa Ventura uluk iha tinan 100 liu ba nia halo revolta hodi hasoru Portugal iha tinan 1912, ne’e historia ne’ebe mak nia rai hela ba jerasaun foun sira hodi bele hatene lolos kona ba historia luta nian.
Entretantu Bei-oan husi Dom Boa Ventura, Joao da Costa Boa Ventura Noronha, hateten sira nia avon Dom Boa Ventura tropa Portugal kaptura iha 1912 depois lori ba Dili e to’o agora la hatene nia paradeiru.
“Iha tempu ida ne’e mos ita la hare ho matan kaer ho liman mais iha momentu ne’e katuas sira konta hanesan ne’e nia ema lori ba iha Dili, hodi kastigu rai ida naran Aipelu mak ema lori fali mai oho iha Dili hakohi iha Santa Cruz,” konta Bei-oan ne’e.
Nudar familia restu mortais senti triste tamba durante tinan 100 nia laran temi deit Dom Boa Ventura nia naran maibe la hatene tuir nia paradeiru.
Dom Boa Ventura rasik hamutuk iha maun alin nain hat, feto ida no mane nain tolu, sira nia inan mai husi Viquque no aman mak ema Manufahi.
