“Hanesan hau dehan bebeik ona katak PNTL intermus de rekursu iha parte krimi organizadu ne’ e sei falta, ne’ e Estadu rekonese, governu rekonese, ho limitasaun ne’ebe maka ita iha, ita la’o neneik, ita buka atu hadia nafatin,” hateten Secretariu Estadu Seguransa (SES), Francisco Guterres, iha Dili.
Hanesan kazu estudante husi Ensino Baziku nain 63 Lospalos, iha Distritu Lautem, ne’ebe envenenadu hafoin han aihan husi merenda eskolar nian, e kazu ne’e diskunfia no nudar krimi organizadu husi ema balun ne’ebe laiha responsabilidade.
Tanba ne’e tuir nia, iha tinan lima ne’e governu presiza tau rekursu ne’ebe diak no sufsiente nune’e bele detekta krimi sira ne’e.
Iha lidun seluk Deputada Albina Marcal Freitas konsidera area ida ne’e importante tanba ne’e iha future presiza halo rekrutamentu ba polisia foun iha area ida ne’e.
“Maibe presiza halo planu ida atu nune’e parlamentu aprova osan tanba kestaun ida ne’e mos importante,” dehan Deputada ne’e.
Alende ne’e Governu mos presiza hasa’e konesementu ba polisia sira kona ba oinsa bele detekta krimi organizadu sira, liu husi nasaun ne’ebe maka nasaun halo kooperasaun bilateral.
“Ita iha kooperasaun bilateral ho nasaun sira seluk atu apoia ita intermus de kapasitasaun no konesementu ba area sira ne’ebe ita seidauk iha liu-liu iha are krimi organizadu,” Deputada ne’e sujere.
