Komunidade Suku Bauro , Sub-distritu Lospalos, Distritu Lautem la asesu ba bee moos durante fulan walu(8) ona tanba bomba bee nian mak avaria.
“Iha ne’eba bee torneira sira ba halo bomba depois mak distribui ba torneira 14 maibe hare ba torneira rua mak bee sai, sira seluk la iha,” kestiona Deputada Albina Marcal Freitas, iha plenaria Parlamentu.
Deputada ne’e ameasa kuandu Governu la toma atensaun ba problema ne’e, mak sira sei kontinua levanta asuntu ne’e iha plenaria.
“Tanba bee ne’e importante ba ita nia moris,” tenik Deputada ne’e.
Hatan ba problema ne’e Sekretariu Estadu Agua e Urbanizasaun (SEAU), Januario Perreira ne’ebe hato’o respostas liu husi karta ba Sekretaria Estadu Asuntus Parlamentares, Deputada Maria Terezinha Viegas katak, problema ne’e akontese tanba bomba avaria.
“Liu husi mekanismu KDD,Koordenaor KDD Distritu Lospalos hanesan mos Admistrador Distritu haruka ona karta ba Kompanha ne’e hodi hadia hikas bomba refere antes entrega projetu ne’e ba komunidade,” dehan SE Viegas.
