Lino de Jesus Torasao, Pesoal Tekniku husi Ministeriu Administrasaun Estatal lamenta tanba tenda ne’e antes ne’e pronto tiha ona maibe tenke sobu fali.
“Tanba seidauk iha intendimentu ida ke koordenadu entre tekniku sira ho sira ne’ebe hola desizaun politika,” lamenta Tekniku Torasao, iha Aldeia Luak, Suku Daisua, Distritu Manufahi, iha Luak, Manufahi.
Tekniku sira lamenta tanba sira rasik mak foti hodi muda besi todan tun sa’e maibe ikus mai tenda ne’e tenke sobu fila fali.
Maske nune’e, Tekniku sira esforsu an hodi finaliza tenda ne’e iha loron ne’ebe determina ona, tanba tenda ne’e uza ba eventu rua (importante) mak hanesan eventu ritual kona ba selebrasaun loron tinan 100 Dom Boa Ventura nian no eventu ofisial (komemorasaun loron independensia 28 de Novembru).
Iha fatin hanesan Negosiante ne’ebe fa’an sira nia sasan iha fatin ne’eba, Agosto da Costa rekonese katak, tenda ne’e sira sobu dala hat duni tanba iha primeiru halo ne’e tenda rabat kedas ho fatin serimonia.
“Horseik no ohin mak sira sobu fila fali, e agora ho distansia do’ok oituan ona husi fatin serimonia ne’e,” tenik Negosiante ne’e.
Tuir nia, tenda ne’e sobu fali diak liu tanba ema barak (husi 13 distritus) mak sei partisipa iha eventu importante ne’e.
