“Kinto Governu Konstitusional tenke responde ba halerik povu kiak, liu-liu ba nesesidades baziku en jeral espesialmente ba feto ho labarik,” hato’o Deputada Ana da Conceicao Ribeiro, iha sira deklarasaun bankada, (10/12), iha PN.
Deputada ne’e dehan, povu kontinua hakilar liu husi Autoriedade lokal inklui liu husi media kona ba nesesidade baziku ne’ebe folin karun, menus aihan, menus be’e no la iha tratamentu saude ne’ebe diak.
“Bankada Fretilin hakarak hato’o no hatutan iha uma fukun ida ne’e,lian hamulak no halerik liu-liu kona ba direitu umanu iha Timor-Leste ne’ebe mak ohin loron povu barak seidauk sente hetan nia direitu ne’ebe hakerek tiha ona iha Konstituisaun RDTL iha artigu 16,17 no artigu 18,” Deputada ne’e katak.
Timor-Leste nudar nasaun demokratika ida iha rejiaun Asia, hari ho ruin no ran, povu barak mak mate,terus oin-oin, faluk barak no oan kiak barak mak soe lemo-lemo iha rai Timor nia laran.
Iha fatin hanesan Bankada CNRT iha sira nia deklarasaun dehan, ema barak mak soe nia vida ba ukun aan ida ne’e nune’e povu bele hetan moris diak maibe realidade barak mak sei moris kiak.
“Tanba ne’e ita hanoin oinsa ita bele hadia fali povu nia moris, sakrifisiu ne’ebe mak ita nia maluk sira halo atu sai nasaun ida livre no independente, ita hotu sei hakribi kualker violasaun direitus umanus iha ita nia le’et,” Xefe Bankada CNRT ne’e dehan.
Iha fatin hanesan Prezidenti da Republika,Taur Matan Ruak (TMR) iha nia diskursu dehan, iha komemorasaun loron Direitus Umanus iha Timor-Leste ba tinan ida ne’e,komemora ho haksolok ba liberdade ne’ebe mak konkista tiha ona iha luta tinan 24 nia laran ho sakrifisiu atu fo direitus umanus ba povu ida ne’e.
“Ita moris iha liberdade,ita nia konstituisaun rekonese direitu ita hotu nian hanesan iha lei nia oin,”dehan Xefe Estadu TMR iha nia diskursu ba komemorasaun loron mundial DH, iha PN.
Xefe Estadu ne’e afirma, Timor-Leste la aplika lei pena morte (ba kriminozu sira), tanba ne’e viola ona ema seluk nia direitu.
“Hanesan sidadaun ita ezersa direitu ba area asosiasaun, liberdade de espresaun no liberdade da imprensa no mos direitu atu fo no simu informasaun,” tenik Prezidente TMR.
