“Ita ne’ebe moris deve hela sira ne’ebe lori ran no mate sosa ukun rasik an ida ne’e, ita iha obrigasaun atu hakas an hodi realize mehi ne’ebe sira iha ba nasaun ida ne’e, sira nia mehi mak moris hakmatek, dezenvolvimentu ba povu Timor-Leste,” dehan Vise PM, Fernando Lasama de Araujo, iha Dili.
Tanba ne’e nia mos husu ba entidade hotu, liu-liu foinsa’e sira atu mantein disiplina, hadomi nasaun ida ne’e no partisipa ativu iha prosesu dezenvolvimentu, tanba sei iha problema barak iha futuru no presiza responsabilidade ema hotu nian atu realize mehi matebian sira nian, ida ne’e mak importante “la’os fahe medalia no sertifikadu ba malu deit,” Vise PM ne’e katak.
Iha parte seluk eis Titulares atual Prezidente Partidu Fretilin, Francisco Guterres ‘Lu-Olo’ katak akontesementu 12 de Novembru nakonu ho istoria no memoria ba povu Timor-Leste hotu tanba ho 12 Novembru mak loke dalan ba Timor-Leste atu hetan independensia tanba ne’e estado labele abandona sovrevivente 12 Novembru sira maibe fo oportunidade ba sira atu estuda mos.
“Horkalan hau foin hare ita nia maun, alin Mateus nia vida ne’ebe sai hanesan vitima 12 de Novembru, hau la hatene atu koalia saida mais vida ida ne’e mak agora dadaun akontese, labele husik 12 Novembru hanesan ne’e maibe lori 12 Novembru atu fo sinal bo’ot ida nafatin,” Prezidente Partidu Historiku ne’e sujere.
Joventude sira ne’e fo an ba mate, mate liu ona maibe ba sira ne’ebe moris liu-liu ba tempu ukun rasik an ida ne’e nafatin fo dignidade ba povu Timor-Leste no joventude sira liu husi kria medidas politika ida ne’ebe lori ita nia joven sira entrega sira nia vida iha sosiedade ida ne’e nia laran atu nune’e joven sira ne’ebe moris bele sai partisipantes ativu iha prosesu dezenvolvimentu nasional.
