“Para atu fo konesementu baziku jornalismu nian ba joven sira para sira mos iha motivasaun, liu-liu sira ne’ebe iha talent ba hakerek bele hakerek opiniaun kritiku ruma ba jornal sira iha rai laran no atrai sira atu lee jornal lor-loron tanba joven sira barak mak baruk lee jornal,” dehan Diretor Nasional da Comunikasaun SEJD, João dos Santos, iha Lecidere, Dili.
Programa ne’e la’os foin hala’o maibe desde tinan 2010 SEJD servisu hamutuk ho Unicef fo ona kapasitasaun Jornalismu no Photografer Baziku ba joven sira iha 13 distritus.
Ba tinan ida ne’e fundu husi SEJD rasik liu husi fundu dezenvolvimentu capital humanu ho total $ 20.110,00 atu fo formasaun hanesan ba joven nain 65 husi 13 distritus e kada distritu ema nain lima ne’ebe sei remata iha tinan ida ne’e.
Iha formasaun durante loron lima ne’e partisipantes sira sei hetan sertifikadu mask nune’e la signifika sira tenke hetan kedas servisu.
“Ne’e hanesan siensia ida ba sira nudar foinsa’e ida iha obrigasaun atu hatene oinsa atu hakerek notisia ida ba jornal,” tenik Diretor ne’e.
Entretantu Prezidente Conselhu Joventude Timor-Leste (CNJTL), Leovigildo Hornai hateten konesementu ba kualker siensia importante ba joventude sira tanba agora tama ona iha era globalizadu, ne’ebe tenke tama ho teknolojia.
“Hau hanoin programa kapasitasaun ba joven sira ne’e diak, formasaun barak diak liu tan maibe tenke ukur ho ezijensia merkado nian liu-liu orienta iha area espesifiku ne’ebe presiza fo kapasitasaun, ne’ebe hau hanoin ba futuru ita tenke prepara formasaun sira ne’e ho didiak hodi absorve ba iha merkado,” dehan Prezidente CNJTL ne’e.
