Hanesan akontese iha Ospital Lospalos ne’ebe fulan hitu ona laiha kombustivel, obriga pasiente sira tenke enxe rasik kombustivel nune’e bele tula ba iha Ospital Referal Baucau (ORB) hodi hetan tratamentu intensive.
“Hau hetan husi relatorio doutor nian katak matebian Afonso da Costa (34) husi Suku Home, Distritu Lospalos, nia tama ospital iha dia 10 Outubru e nia mate iha dia 19 Outubru, durante loron sia iha ospital, inisiu nia (matebian) tama doutor dehan ba nia “se o iha osan hola mina tau ba ambulansia evakua mai Ospital Referral Baucau maibe tanba nia laiha osan nia lasimu rujukan ne’e e nia hein mate deit iha ospital Lospalos,” kestiona Deputadu Aurelio Freitas Ribeiro, foin lalais, iha Parlamentu Nasional.
Deputadu ne’e preokupa tanba Parlamentu aprova Orsamentu Ratifikativu ba tinan ida ne’e ho montante kuaze $1.6 milioens hodi responde ba problemas saude nian inklui transferensia iha 100 dias maibe realidade osan hirak ne’e laiha rezultadu. “Kazu ida ne’e seriu la halimar,” Deputadu ne’e tenik.
Tuir nia, maske iha momentu ne’e familia matebian enxe duni mina ba kareta ambulansia, maibe tanba tarde liu ona entaun pasiente ne’e tenke mate iha dalan klaran.
Nudar Reprezenta povu iha PN, nia lamenta tebes ho servisu Ministeriu Saude (MS) nian ne’ebe la tau atensaun masimu ba problemas hanesan ne’e.
Hatan ba kestaun ne’e Diretor Nasional Administrasaun Logistica e Aprovizionamentu MS, Leão Borges katak prosesu distribuisaun kombustivel ba ospital distrital sira, husi distritu tenke halo karta mai iha Finansas Ministerio nian atu prosesa hodi hetan karta Orden Pagamentu nian, bazeia ba karta PO ne’e mak kompanai bele halo drop kombustivel ba distritu.
“Horbainrua iha enkontru ami fo ona hanoin ba Departamentu Finansas buka atu rezolve karik karta PO seidauk iha finansas bele aloka osan ba compania ne’ebe drop mina ba parte leste bele sosa kombustivel no drop ba distritu Lospalos nian,” dehan Diretor Nasional ne’e.
Nia dehan, to’o ohin loron sira seidauk haruka karta ida ba compania atu drop kombustivel ba distritu liu-liu distritu Lospalos tanba bazeia ba karta Orden Pagamentu mak sira bele halo pedidu ida ba compania hodi drop kombustivel ba distritu.
