Desde okupasaun Indonezia to’o Timor-Leste ukun an rasik violasaun ba Direitus Umanu kontinua akontese no buras iha rai laran e situasaun ne’e hamosu lamentaoens husi membru Parlamentu Nasional no husu ba Instituisaun Provedoria dos Direitus Umanus e Justisa (PDHJ) atu fo atensaun masimu.
“Tenke hola medidas ba autor sira ne’ebe gosta viola ema seluk nia direitu, fo kastigu ne’ebe todan nune’e bele diminui kazu violasaun direitus umanu iha rai laran,” hateten Deputadu Manuel G.da Costa Guterres,(03/12), iha PN.
Nudar Reprezentante povu iha Uma Fukun PN, sira simu keixa deit e Instituisaun PDHJ mak iha kompetensia atu halo investigasaun klean ba problema violasaun direitu umanu ne’ebe dalabarak akontese iha rai laran.
“Se ita lakohi ema viola ita nia direitu, entaun ita tenke respeita mos ema seluk nia direitu, ezemplu sunu paison, ida ne’e ema bandu tiha ona labele sunu, maibe realidade agora iha Dili laran ema sunu paison iha fatin-fatin, ne’e viola ona ema seluk nia direitu tanba halo ema toba la hakmatek,” dehan Deputada Virginia Ana Belo.
Deputada ne’e sujere ba Polisia Nasional Timor-Leste atu hare kestaun ne’e tanba bainhira kalan komunidade sira toba la diak ho sunu paison ne’ebe halo tarutu maka’as. n
