Iha 10 Outubru 2012 Tribunál Distritál Suai (TS) kondena arguidu ho inisial SA pena tinan 15 iha prizaun ba krime Abuzu Seksuál (AS) hasoru vítima ho idade tinan 11. Kazu ne’e akontese iha Aldeia Loro no Suco Suai Loro, Sub-Distritu Suai, Distritu Covalima.
Tribunál refere ba relatóriu médiku nian ne’ebé hatudu katak arguidu sofre moras mentál no depoimentu husi vítima no arguidu ne’ebé deklara katak arguidu iha moras mentál.
Enkuantu Ministériu Públiku (MP) akuza arguidu ho artigu 24 Kódigu Penál (tentativa) ho artigu 177 Kódigu Penál kona-ba Abuzu Seksuál ba menor ne’ebé hatur pena tinan 5 to’o15 iha prizaun.
“JSMP konsiente katak iha kestaun inimputabilidade tanba anomalia psíkika eziste iha kazu ne’e, maibe desizaun ne’e manisfesta komitmentu tribunál nian atu maneija priodade ba interese diak labarik sira nian nomos atu proteje labarik sira husi kualkér forma violénsia ne’ebé kontra labarik sira nia interese,” dehan Diretor Ezekutivu Judycial Sistem Monitoring Program (JSMP), Luis de Oliveira Sampaio, iha Dili.
Kazu ne’e rejistadu ho Númeru Prosesu: 78/PEN/2012/TDS. Audiénsia leitura akórdaun ne’e, dirije husi Juíz Pedro Rapoza Figuereiro (internasional), Ministériu Públiku reprezenta husi Oscar Silva Tavares no arguidu hetan defeza husi João Henrique de Carvalho husi Eskritóriu Defensória Públika.
Iha lidun seluk Deputada Josefa Alvares Soares hateten, ne’e rezultadu ne’ebe maka apar duni ho arguidu nia hahalok, tanba lei bandu teb-tebes atu ema halo abuzu seksual ba labarik minoridade.
“Ne’e buat ida ke los no tenke halo hanesan ne’e duni, tribunal iha razaun duni atu kondena ema ne’e (Arguidu) tanba halo abuzu seksual ba labarik minoridade ne’e asaun nebe maka ema hotu-hotu la admiti hahalok ida ne’e,” dehan Deputada Soares.
Tuir nia, Grupu Feto Parlamentar Timor-Leste (GMPTL) iha ona planu atu halo treinamentu ba komuniade sira iha area rurais atu fo konesementu ba sira kona ba oinsa atu bele hado’ok an husi asaun Violensia Domestika no Abuzu Seksual.
