Selebrasaun loron Nasional ba Feto Timor-Leste ne’ebe monu iha dia 3 fulan Novembru, Grupu Mulher Parlamentar Timor-Leste (GMPTL) sei halo sosializasaun ba Lei Violensia Domestika (VD) inklui halo dialogu ho Komunidade iha Quelecai no Betano hodi rona dificuldade ne’ebe feto maluk sira iha area rural infrenta durante ne’e.
Tanba realidade komunidade liu-liu feto rural sira sei menus konesementu kona ba lei Violensia Domestika ne’ebe vigor ona iha rai laran.
“Ami forma ekipa rua hodi ba selebra loron importante ne’e ho komunidade Quelecai no Betano ho oportunidade ida ne’e ami mos sei hato’o mos informasaun kona ba lei violensia domestika, partisipasaun feto iha tempu luta no dialogu seluk tan,” dehan Vise Prezidente GMPTL, Albina Marçal Freitas, iha Parlamentu Nasional.
Iha parte seluk Xefe Suku Soba, Sub-distritu Laga, Distritu Baucau, Francisca Monica de Fatima Soares hateten selebra loron nasional feto hanesan momentu ne’ebe importante tebes liu-liu selebra iha area remotas tanba komunidade barak mak seidauk iha konsementu kona ba VD no oinsa mak halo keixa bainhira akontese violensia.
“Iha dificuldade barak iha suku laran tanba komunidade barak mak la hetan sosializasaun ne’ebe diak kona ba lei No. 3/ 2009 inklui barak mos la komprende igualidade jeneru no servisu Pontu Focal Jeneru nian ne’ebe muda ona ba Grupu Trabalhu Jeneru no lei violensia domestika rasik tanba ne’e sosializasaun no dialogu importante tebes ba area rurais,” dehan Xefe Suku ne’e.
Tanba la hakfodak bainhira feto iha area rurais dificil atu asesu ba edukasaun formal no non formal tanba impaktu husi sistema patriarcal ne’ebe sei domina iha area rurais.
