Durante fulan Outubru nia laran Banku Urgensia (BU) Ospital Nasional Guido Valadares (HNGV) registu pasiente hamutuk 1.385 kompostu husi feto nain 605 no mane 780, e pasiente sira ne’e ho moras oi-oin.
“Ami agora dadaun iha treagen ne’e halo selesaun ba moras, katak moras ne’ebe mai ho kategoria emergensia bele tama liu mai iha assessment room liu-liu sira ne’ebe rujukan tanba ami konsidera sira ne’e kazu ne’ebe urgent atu hetan atendementu uluk, sira ne’ebe ladun urgent hein iha liur iha mediku atu fo atendimentu ba sira,” dehan Xefe Departamentu BU, Americo dos Santos, iha HNGV Bidau Toko Baru, Dili.
Moras hirak ne’e mak hanesna Infeksaun Respiratorio (ISPA), Diarea, Moras kulit inklui moras Asma ne’ebe maioria labarik minoridade sira ak afeta tanba impaktu husi klima ne’ebe iha.
Entre moras hirak ne’e, moras ISPA sai numeru um (no.1), tuir fali moras Diarea ne’ebe afeta liu ba labarik minoridade sira (10 mai kraik), e husi numeru ne’ebe iha barak liu mak baixa tanba moras ne’e perigu ba labarik sira nia saude.
Entertantu tuir Pasiente Manuel katak moras ISPA la’os deit rejistu as iha HNGV maibe iha Sentru Saude hotu inklui Klinika Privadu sira iha teritoriu tomak, tanba impaktu husi bailoro naruk ne’ebe halo rai rahun suar maka’as.
“Ne’ebe la’os ita mak moris iha fo’er laran, tanba ita moris iha mos laran hanesan uma laran mos, han mos maibe sai mai iha liur, pior liu iha sidade laran nakonu ho rai rahun loron ida deit ita bele afeta moras ISPA ne’e,” dehan Pasiente ne’ebe halo hela konsulta iha Sentru Saude Formosa ne’e.
