“Suspeitu nain hat ne’e entrega ba primeiru interogatoriu hotu ona no agora prosesu la’o hela, ami hein katak ita bele halo ho lalais,” informa Diretor Servisu Infestigasaun Criminal (SIC), Superintendente Calisto Gonzaga, iha Kaikoli, Dili.
Kazu asasinatu ne’e akontese iha dia 25 Outubru 2012, iha tuku 07:00 kalan husi ema nain rua ne’ebe taka oin ala ninja, lori ho sasan kroat hanesan katana hodi oho familia uma kain rua (inklui feto no labarik no bebe) e husi akontesementu ne’e nain neen (ferik nain tolu, labarik nain rua no katuas nain ida) mate kedas iha fatin.
Enkuantu sira seluk ne’ebe hetan kanek kmaan no todan inklui mate isin ema nain neen (6) ne’e lori kedas ba Ospital Nasional Guido Valadares (HNGV) hodi hetan tratamentu intensivu no mos halo autopsia ba mate isin sira nain neen ne’e.
Prosesu autopsia ba mate isin sira ne’e agora hotu ona no husi Ospital entrega ona ba iha familia hodi bele halo prosesu funerariu, no sira ne’ebe baixa agora dadaun alta hotu ona tanba sira nia saude rekopera tiha ona.
Maske kaptura ona ema nain hat maibe sira seidauk hatene lolos motivu husi akontesementu ne’e, e prosesu investigasaun kontinua la’o.
“Wainhira prosesu ne’e loke tiha maka ita bele hatene muitu ben kona ba motive akuntesementu ne’e, maibe iha indikasaun katak ne’e tanba problema eransa, mais ne’e hanesan indiksaun deit, ne’e duni, hein deit prosesu investigasaun maka bele responde, los duni katak tanba eransa ou tanba buat seluk,” dehan Diretor SIC ne’e.
Entretantu Deputada Albina Marçal Freitas sujere ba polisia atu buka tuir autor ba kazu ne’e no prosesa sira tuir lei ne’ebe vigor iha nasaun ne’e.
“Tanba oho ema ne’e krimi, polisia iha dever atu buka tuir ema ne’e hodi bele responsabiliza ba nia hahalok ne’ebe maka nia halo ona,” sujere Deputada ne’e.
Deputada ne’e lamenta ho akontesementu ne’ebe hamate ema nain neen, liu-liu feto no labarik ne’ebe ho idade sei nurak (bebe) sai vitima ba akontesementu ne’e.
“Oho malu no sona malu, ne’e la’os resolve problema maibe aumenta problema, tanba ne’e wainhira iha problema tenke koalia didiak hodi buka solusaun, la’os ba oho malu fali hanesan ne’e,” Deputada ne’e fo sujetstaun.
