Durante fulan Outubro nia laran pasiente asidente trafiku hamutuk 111 mak registu iha Banku Urgensia (BU) iha Ospital Nasional Guido Valadares (HNGV), vitima sira ne’e kompostu husi feto, mane inklui mos labarik minoridade sira.
“Asidente ho motor deit hamutuk nain 63 kompostu husi feto no mane, asidente kareta hamutuk nain 48 total iha 111, ne’e mak registu iha ami nia livru situais, maibe laiha ida mak mate iha dalan tanba to’o iha ne’e ami sempre hetan ajuda husi ami nia Medikus, Emfermeirus sira,” dehan Xefe Departamentu Banku Urgensia, Americo dos Santos, iha Bidau Toko Baru, Dili.
Maske husi numeru ne’e laiha ida mak mate maibe balun ne’ebe hetan kanek todan hanesan ain, liman tohar ne’e presiza baixa enkuantu kanek kmaan halo observasaun iha Sala Emergensia, balun mos fila kedas bainhira hetan ona atendementu husi Pesoal sira tanba konsidera la grave.
Entretantu Komandante Polisia Nasional Tranzitu (PNT), Inspektur Xefe Antonio L. C Soares hateten total asidente trafiku (motor no kareta) durante fulan Outubru iha teritoriu tomak hamutuk 136 kazus, balun prosesa ona iha tribunal.
“Hau hanoin factor asidente sem pursentu husi ema tanba ho kondisaun lanu kareta monu rasik rezulta ema kanek, soke ema, la kontrola velosidade kareta inklui mos motor no laiha karta kondusaun,” dehan Komandante PNT ne’e.
Husi numeru ne’ebe iha, iha ema nain tolu mak mate, nain rua mate kedas iha fatin akontesementu iha Distritu Manufahi no Liquisa, enkuantu ida seluk husi Distritu Baucau mate hafoin to’o iha Ospital Referal Baucau (ORB), tanba hetan kanek todan iha ulun, no restu nain 19 kanek tohar,no nain 117 kanek kmaan.
