Atu proteze saúde labarik minoridade (0-5 anos) nian husi moras oin lima ne’ebe sai perigu ba sira nia saude, Ministeriu Saude (MS) lansa programa Vasina Pentavalent, nune’e labarik sira bele livre husi moras at sira.
Moras oin lima ne’e mak hanesan Diphtheria, Pertussis, Tetanus, Hepatitis B, no Haemofilus influensa B (Hib) ne’ebe bele prevene moras Pneumonia, Meninjitis tanba moras sira ne’e bele fo ameasa ba labarik nia saúde.
“Ami nia objetivu ba lansamentu ida ne’e atu prevene no fo protesaun ne’ebe masimu ba labarik minoridade sira nia saúde tanba sira mak futuru nasaun nian, governu iha obrigasaun atu prevene sira husi moras ne’ebe perigu tanba moras sira ne’e kona labarik bele moras todan no mate,” dehan Xefe Departamentu Planeamentu Familiar no Monitorizasaun, Mateus Cunha, iha Sentru Saúde Formosa, Dili.
Programa vasinasaun ne’e sei implementa iha Sentru Saúde no Servisu Integrado Saúde Komunitaria (SISKA) sira iha sukus, tanba ne’e husu ba inan aman sira atu lori sira nia oan ba iha fasilidade saúde hodi hetan vasinasaun.
Atu labarik sira hetan vasinasaun Pentavalent kompletu sira tenke vizita fasilidade saúde dala lima hodi hetan protesaun ne’ebe masimu ba labarik sira nia saúde, enkuantu ba sira ne’ebe la hetan vasinasaun kompletu signifika katak protesaun ba sira nia saúde la masimu no bele afeta moras oin lima ne’ebe iha.
Iha parte seluk Profesional Saúde, Madalena Hanjam ne’ebe partisipa iha lansamentu ne’e dehan, Vasina Pentavalent ne’e importante tebes atu prevene labarik sira husi moras ne’ebe perigosu ba sira nia saúde hanesan infeksaun ba pulmaun no kakutak.
“Tanba ne’e husu ba para familia hotu tenke lori sira nia oan ne’ebe foin moris hetan vasinasaun pentavalent dala lima hodi salva labarik sira nia vida, nune’e labarik sira ne’ebe isin manas, dada is bo’ot no isin manas iha kakutak mos bele lakon tanba ne’e hau kontente tebtebes programa ida ne’e lansa ona signifika katak ita bele salva ona labarik sira nia vida,” dehan Profesional Saude ne’e.
Nia espera katak, ho prezensa programa foun ida ne’e bele redus numeru labarik mate no moras iha Timor-Leste.
