Antes misaun remata iha Timor-Leste, Formed Police Unit (FPU) Malaysia entega kareta hamutuk 28 ba Instituisaun Polisia Nasional Timor-Leste (PNTL) liu husi Ministeriu Finansas (MF).
“Ajudus ne’ebe maka ami fo ba ne’e hanesan komitmentu nasaun Malaysia nian atu ajuda Timor-Leste iha parte logistic, tanba ne’e maka ami entrega kareta 28 ne’e ba Timor-Leste,” dehan Commissioner Police Malaysia, Dato Sri Salleh Mat Rasid, iha Comoro, Dili.
Komisariu FPU ne’e espera katak, kareta ne’ebe sira entrega ne’e iha duni valor ba Timor-Leste, liu-liu Instituisaun ne’ebe hetan kareta ne’e hodi fasilita hala’o servisu ho diak.
“Alende kareta ami mos fo fasilidade seluk hanesan material troka kareta nian,” Komisariu FPU ne’e tenik.
Entretantu Diretor Jeral Finansas Estadu, Antonio Freitas en nome de Governu fo agradese ba Kontegente Malaysia nian ne’ebe ajuda ona Governu Timor-Leste.
“Ita fo agradesementu ba sira, e kareta hirak ne’e sei fo ba iha polisia, liu-liu sira ne’ebe maka iha area fronteira ne’eba, hodi ajuda sira nia servisu,” dehan Diretor Jeral Finansas Estadu, Antonio Freitas, (07/11), iha Comoro, Dili.
Governu mos iha hanoin oinsa maka bele halo manutensaun ne’ebe rutina ba kareta hirak ne’e atu nune’e bele uza iha tempu ne’ebe maka naruk.
“Ita la’os simu deit maibe mos ita halo ita nia analiza ida kona ba manutesaun ba ekipaementus ne’ebe maka sira fo inklui mos kontegente Malaysia, kareta sira ne’e iha kondisaun diak hotu, no ami halo ona planu atu bele halo nia manutensaun e orsamentu ba manutensaun ba kareta ne’e ladun karun tanba kuaze Toyota ne’ebe ita iha ona analiza ba ida ne’e,” dehan Diretor Jeral Finansas Estadu ne’e.
